موڭعولييا مەملەكەتٸ حالىقارالىق تٷركٸ اكادەميياسىنىڭ جانىندا باقىلاۋشى بولۋ ۇسىنىسىن قاراستىرادى. بۇل تۋرالى ەلوردادا التىن وردا مەملەكەتٸنٸڭ 750 جىلدىعىنا ارنالعان دٶڭگەلەك ٷستەل وتىرىسىندا موڭعولييا پرەمەر-مينيسترٸنٸڭ ورىنباسارى ٶلزييسايحانى ەنحتٷۆشين مەلٸم ەتتٸ, دەپ حابارلايدى قازاقپارات.
«قازاقتار مەن موڭعولدار ەجەلدەن تاريحي ساباقتاستىعى ورتاق, بٸر-بٸرٸمەن تىعىز بايلانىستا ٶمٸر سٷرٸپ كەلگەن كٶرشٸ باۋىرلاس حالىقتار. سوندىقتان بٸزدٸڭ قارىم-قاتىناسىمىز ٶتە تىعىز بولۋى كەرەك دەپ ويلايمىن. جالپى, ٶزارا بايلانىستارىمىز جاقسى قارقىنمەن جٷرٸپ جاتقانىنا ٶتە قۋانىشتىمىن. قازاقستاننىڭ جەرٸندە شىڭعىس بابامىزدىڭ ۇرپاقتارى ٶمٸر سٷرگەن, سول كٸسٸنٸڭ ٷلكەن ۇلى جوشى حاننىڭ كٷمبەزٸ وسى جەردە تۇرعانىن بٸلەمٸز. سوعان بايلانىستى التىن وردانىڭ 750 جىلدىعىنا وراي اۋقىمدى جۇمىستار اتقارىلىپ, وسى ەسكەرتكٸشتٸ قورعاۋ, تۋريستٸك ورتالىققا اينالدىرۋ, ەلەمگە تانىتۋ, سونداي-اق بٸزدٸڭ ورتاق ٶركەنيەتٸمٸزدٸ ناسيحاتتاۋ باعىتىندا قازاقستاننىڭ ٸستەپ جاتقان جۇمىستارىن بٸزدٸڭ مەملەكەتٸمٸز جان-جاقتى تولىق قولدايدى. قازاقستاننىڭ بۇل باستاماسىنا ٶز باسىم سٷيسٸنٸپ وتىرمىن», - دەدٸ ٶلزييسايحانى ەنحتٷۆشين حالىقارالىق تٷركٸ اكادەميياسىندا ٶتكەن دٶڭگەلەك ٷستەل وتىرىسىندا.
سونىمەن قاتار ول 2020 جىل تونىكٶك ەسكەرتكٸشٸنٸڭ 1300 جىلدىعىنا ارنالاتىنىن ەسكە سالدى.
ونىڭ سٶزٸنە قاراعاندا, موڭعوليياداعى قاراقورىمنىڭ 800 جىلدىعىن بٸرلەسٸپ تويلاۋ, وسى شارالار ارقىلى مەدەنيەتتٸ ناسيحاتتاۋ حالىقتاردىڭ تۋىستىق بايلانىستارىن كٷشەيتە تٷسەدٸ.
«الداعى جىلدىڭ تامىز ايىندا قاراقورىمنىڭ 800 جىلدىعىن اتاپ ٶتۋگە جوسپار جاسادىق. بۇل سالادا حالىقارالىق تٷركٸ اكادەميياسىنىڭ مٷمكٸندٸگٸ زور, سەبەبٸ بٸر جاعىنان عىلىمي مەكەمە بولسا, ەكٸنشٸ جاعىنان حالىقارالىق ۇيىم مەرتەبەسٸنە يە. سوندىقتان وسى بەدەلٸ زور اكادەمييامەن بٸرلەسە وتىرىپ, بۇل باعىتتاعى شارالاردى قارقىندى جٷرگٸزە الامىز دەپ ويلايمىن. حالىقارالىق تٷركٸ اكادەميياسى 2014 جىلدان بەرٸ موڭعولييانىڭ عىلىم اكادەميياسىمەن, ۇلتتىق مۋزەيٸمەن, ارحەولوگييا ينستيتۋتىمەن, ارحيۆ باسقارماسىمەن مەموراندۋم ورناتىپ, جاقسى جۇمىستار اتقارعانىنا ريزاشىلىعىمىزدى بٸلدٸرەمٸز», - دەپ اتاپ ٶتتٸ موڭعولييا پرەمەر-مينيسترٸنٸڭ ورىنباسارى.
وسى ورايدا ول موڭعولييا اۋماعىندا قازاقستان عالىمدارى تاراپىنان جٷرگٸزٸلەتٸن زەرتتەۋلەرگە قولداۋ جاسالىپ كەلگەنٸن ايتتى.
سونداي-اق, قر ٷكٸمەت باسشىسىنىڭ ورىنباسارى بەردٸبەك ساپارباەۆتىڭ حالىقارالىق تٷركٸ اكادەميياسىنا موڭعولييانىڭ باقىلاۋشى بولۋىنا جاساعان ۇسىنىسىنا ٶز پٸكٸرٸن بٸلدٸردٸ.
«موڭعولييانى باقىلاۋشى ەتۋ تۋرالى ۇسىنىسقا وراي ارنايى كوميسسييا توبىن جاساقتاپ, ەلٸمٸزدٸڭ زاناماسى اياسىندا تيٸستٸ شەشٸم جاسايتىن بولامىز. جالپى, عالىمدارىمىزدىڭ ەڭبەكتەرٸ تەرەڭ ماعىنالى بولسىن, بۇل زەرتتەۋلەر ەلدەرٸمٸز ٷشٸن ولجالى بولسىن دەپ تٸلەيمٸن», - دەدٸ ٶلزييسايحانى ەنحتٷۆشين.
