Áleýmettik meditsinalyq saqtandyrý qoryna qarasty meditsinalyq kómektiń sapasyn baqylaý departamentiniń direktory Lázzat Shomanova mobildi brigadalar qyzmetine qatysty syndarǵa jaýap berdi, dep habarlaidy QazAqparat.
Ortalyq kommýnikatsiialar qyzmetinde ótken brifingide BAQ ókilderi ÁMSQ mamandaryna elimizdiń ár túkpirinen mobildi meditsinalyq brigadalardyń jaibasarlyǵyna jáne jetkiliksiz jabdyqtalǵanyna shaǵym kóp túsip jatqanyn jetkizdi.
«Koronavirýs juqtyrǵan naýqastarmen jumys boiynsha mynany túsindirgim keledi. Mobildi brigadalar kelmeitini týraly másele aimaqtyq densaýlyq saqtaý basqarmalarynyń quzyrynda. Mobildi brigadalardyń jumysyn Densaýlyq saqtaý basqarmasy uiymdastyrady. Óitkeni ondai brigadalar dárigerlik ambýlatoriialarda ashylady. 5 myń turǵynǵa shaqqanda bir mobildi brigada dep eseptelgen. Mobildi brigada jiti respiratorlyq virýstyq infektsiia, pnevmoniia jáne koronavirýs juqtyrýy múmkin naýqastarǵa barady. Bul rette, eger atalǵan kómek kórsetilmese nemese emhana bul kómekten bas tartsa, onda qordyń 1406 telefonyna habarlasyp, naýqastirkelgen emhanany kórsetý tiis. Bul qor mamandarynyń shaǵymǵa ýaqtyly jaýap berýi úshin qajet», - dep túsindirdi Lázzat Shomanova.
