Foto: ©️ Tengrinews.kz / Turar Qazanǵapov
«Qazaqstan» shahtasyndaǵy qaiǵyly oqiǵadan keiin qaýipsizdik tehnikasy kúsheitilmedi, eskertý júielerine aýdit júrgizilmedi. Bul týraly Parlament Májilisiniń depýtaty Nikita Shatalov aitty, dep habarlaidy Kazinform agenttigi.
«Qazaqstan» shahtasyndaǵy qaiǵyly oqiǵadan keiin 2 aidan astam ýaqyt ótti. Menshik iesi bolǵan oqiǵaǵa qatysty eshqandai qorytyndy jasaǵan joq. Qaýipsizdik tehnikasy kúsheitilmedi, eskertý júielerine aýdit júrgizilmedi. Adamdar óle berdi. Mittal men onyń qaramaǵyndaǵylarǵa bizdiń otandastarymyzdyń jai-kúii men taǵdyryna báribir», - deidi depýtat.
Shatalov Úkimettiń Arselormen kelissózderge núkte qoiýy kerektigin, bizdiń elimizge mundai investor qajet emestigin basa aitty.
«Tek sońǵy jyldary olar júzdegen milliard teńge paida tapty. Jańǵyrtý men ónerkásiptik qaýipsizdikke bólingen investitsiialyq baǵdarlamalar aqshasy qaida ketti degen jeke suraq týyndaidy. Bul týraly da oilaný kerek, óitkeni bireýlerdiń jasyryp-kómektesýi bolmasa, munyń bári múmkin emes edi. Bizge otandyq investor kerek.
Mittaldyń kásiporyndarynda jumys isteitin jerlesterimniń onyń ketýinen qorqatynyn bilemin. 90-shy jyldardan beri eshteńe ózgergen joq. Biraq eger ol qalsa, bizde birde-bir jumys isteitin shahta qalmaidy. Óitkeni tragediialar ári qarai da qaitalanatyny anyq. Temirtaýdaǵy shahtalar men zaýytta jumys isteitin adamdardyń ómirin saqtap qalýdyń jalǵyz joly – menshik iesiniń aýysýy. Jáne bul múmkindiginshe tez bolýy kerek», - dep pikir bildirdi spiker.
Aita keteiik, búgin Memleket basshysy Úkimetke «ArselorMittalTemirtaý» kompaniiasymen investitsiialyq yntymaqtastyqty toqtatýdy tapsyrdy.
