Halyqaralyq «Ádil sóz» sóz bostandyǵyn qorǵaý qorynyń prezidenti Tamara Kaleeva beibit jiyndarǵa qatysatyn jýrnalisterdiń quqyǵyn qorǵaýǵa qatysty óz usynysyn bildirdi, dep habarlaidy QazAqparat.
«Eń aldymen Aqparat jáne qoǵamdyq damý ministrliginiń ashyqtyǵyn atap ótkim keledi. Búginge deiin mundai shynaiy konstrýktivti talqylaý kóp bolǵan emes. Biz bul máseleni óz ujymymyzda ǵana talqylaityn edik. Atap aitqanda keshe biz óz bastamamyzben «Ádil sóz», Internews, Quqyqtyq media-ortalyq, Informbiýromen birigip, shaǵyn talqy ótkizdik. Álbette bul erejelerdiń eń bir artyqshylyǵy – baspasóz ortalyqtaryn qurý. Áý basta bul qadam jýrnalisterdiń quqyǵyn shekteýi múmkin degen pikir aitylǵan edi. Alaida erejeler boiynsha júrgizilgen jumys bul qaýipti seiiltkendei boldy», - dedi Tamara Kaleeva Aqparat jáne qoǵamdyq damý ministri Aida Balaevanyń qatysýymen ótken onlain-kezdesýde.
Qoǵam ókili talqylanýy tiis máselelerdi ortaǵa saldy.
«Beibit jinalysqa qatysatyn jýrnalist» degen ataýdyń ózin ajyratyp alaiyq. Ol beibit jinalysqa qatysýshy, kórermen nemese jýrnalist retinde qatysa ma? Biz ózimizdiń usynysymyzdy ortaǵa salyp, «beibit jiynda aqparatty jinaý, daiarlaý jáne taratý boiynsha kásibi qyzmetin atqaratyn jýrnalistik jumys» dep engizdik. Bizge ataýdy ózgertpek kerek. Sebebi zańda áý bastaǵydai jazylǵan dedi. Zań bolsa bolsyn, degenmen qaǵidattaǵy ataýdy osylai ózgertýdi usynamyz», - dedi ol.
Sonymen qatar ákimdikterge beibit jiyndarda BAQ quqyǵy shektelip jatsa, ákimdik ony tirkep otyrýy kerektigi usynylǵan.
«Aqparat jáne qoǵamdyq damý ministrligi bul másele Qylmystyq kodeks sheńberinde retteletinin habardar etti. Biraq biz is qozǵaý týraly emes, quqyqtyń shektelýin tirkeý týraly aityp otyrmyz. Iaǵni jýrnalisti bir jerge kirgizbei jatsa nemese qolynan kamerany tartyp alsa, ony tirkeýge bola ma?», - dep usynysyn engizdi Tamara Kaleeva.
Buǵan deiin habarlaǵanymyzdai, Aqparat jáne qoǵamdyq damý ministrliginiń Facebook paraqshasynda jýrnalisterdiń beibit jiyndarda qyzmet etý qaǵidalary talqylanǵan bolatyn.
