Qalanyń bas memlekettik sanitarlyq dárigeri Jandarbek Bekshin almatylyqtardy mitingiler men jappai jiyndarǵa qatyspaýǵa shaqyrady, dep habarlaidy "Ult aqparat".
«Qalada koronavirýs indeti boiynsha tirkelgen oqiǵalar áli jalǵasýda, tek ótken táýlik ishinde belgisi bar 49 adamnan infektsiia anyqtaldy, al bir apta ishinde – 334 adam tirkeldi. Osylaisha, Almatyda barlyǵy 2790 adamnan koronavirýs tirkeldi, 10 adam qaitys boldy», – deidi Jandarbek Bekshin.
Onyń aitýynsha, indetti juqtyrýshylar statistikasy pandemiia aýqymynyń áli de azaimaǵanyn kórsetedi.
«Osyny eskere otyryp, qalanyń bas sanitarlyq dárigeri ári sanitarlyq-epidemiologiialyq jaǵdaidyń nasharlaýyna jol bermeitin jaýapty adam retinde, sońǵy kezderi áleýmettik jelilerde tarap jatqan adamdar kóp jinalatyn buqaralyq sharalar men mitingke shaqyrýdyń tózgisiz ekendigine nazar aýdaramyn. Qalada epidemiia áli de jalǵasyp jatqan kezde adamdardyń ómiri men densaýlyǵyna qaýip tóndirý baryp turǵan jaýapsyzdyq», – deidi ol.
Álemdik tájiribe kórsetip otyrǵandai, kóp jinalý, jaqyn aralasý azamattardyń indetti jappai juqtyrýyna ákep soǵady.
«Óitkeni, mitingter juqtyrý oshaǵy bolyp tabylady. Eger, mundai buqaralyq sharalar indetti juqtyrýǵa sebepshi bolsa, onda mitingterdi uiymdastyrýshylar zańnamaǵa sáikes jaýapqa tartylady, tipti qylmystyq is qozǵalady. Osyndai buqaralyq sharalarǵa qatysýshylar indet juqtyratyn bolsa, onda epidemiologiialyq tekserý aiasynda shettetiledi», – dedi ol.
COVID-19 juqtyrǵandar infektsiialyq aýrýhanaǵa jatqyzylady.
«Olarmen aralasqandar, meili olar indetti kepshilik jerde nemese úide juqtyrsyn, provizorlyq jáne karantindik gospitalda oqshaýlanady. Sanitarlyq-epidemiologiialyq hattamanyń talaptary osyndai, biz ony mindetti túrde oryndaimyz. Hattamaǵa sáikes, sanitarlyq-epidemiologiialyq qyzmetkerler karantin rejiminde jappai jiyndarǵa qatysqan azamattardy tirkep, videotúsirilim júrgizedi. Al, tirkeý qatysýshylar sanyn eseptep, juqtyrý oshaǵynyń epidemiologiialyq tekserýin odan ary júrgizip, koronavirýstyń taralýynyń aldyn alý úshin qajet», – dedi bas sanitar dáriger.
Sonymen qatar, ol buqaralyq sharalarǵa, mitingterge qatysýshylar koronavirýs juqtyrýdyń epidemiialyq tizbegin quraitynyn atap ótti. Osynyń saldarynan indet Sizdiń úiińizge, otbasyńyzǵa taraidy, eń aldymen balalarǵa jáne qart adamdarǵa qaýip tóndiredi.
«Mine, sondyqtan men buryndary Almaty qalasynyń aýmaǵynda túrli buqaralaryq sharalardy ótkizýge tyiym salý jóninde qaýly qabyldaǵan edim. Qart adamdar men burynnan qalyptasqan syrqaty bar jandardan adamdar kóp jinalatyn jerlerden aýlaq júrýdi suraimyn. Óitkeni, Siz indetti tez juqtyratyndar sanatyna jatasyz. Budan ózge, jappai juqtyrý qaýpiniń bolýy múmkin ekendigin eskere otyryp, tiisti qyzmetterden adamdar kóp jinalatyn oryndarǵa dezinfektsiia júrgizýdi kúsheitýdi talap etemin», – dedi ol.
Onyń aitýynsha, talaptar men ótinishter qalanyń ár turǵynynyń densaýlyǵyn qorǵaý men sanitarlyq-epidemiologiialyq jaǵdailardy jaqsartýǵa negizdelgen.
«Sondyqtan barlyq almatylyqtardan jaýapkershilik tanytýdy ótinemin. Óitkeni, qoǵamnyń densaýlyǵy árqaisymyzdyń jeke qaýipsizdik sharalaryn múltiksiz oryndaýymyzdan quralady», – dep qortyndylady J. Bekshin.
