Almatylyq politsiia departamenti azamattarǵa sanktsiialanbaǵan mitingten aýlaq júrý jóninde keńes berdi, dep habarlaidy QazAqparat tilshisi.
Qalalyq politsiia jaqynda ekstremistik qozǵalystyń sanktsiialanbaǵan mitingine qatysqany úshin birneshe adamdy ustady.
«Quqyq qorǵaýshylar kúdik týǵyzatyn basqosýlarǵa jinalmaýdy eskertedi. Bul mitingige sanktsiia berilmegen. Jai ǵana ótip bara jatqan adamdarǵa qaýip joq, árine. Olar tek oqiǵa ortasynda júrmese boldy», - dedi politsiia departamentiniń resmi ókili Saltanat Ázirbek.
Onyń aitýynsha, mitingte kezdeisoq adam júrmeidi.
«Adamdar qalai osyndai jaǵdaiǵa túsip qalady? Quqyq qorǵaýshylardyń eskertýine qaramastan kóp adam shoǵyrlanǵan jolmen ótýge tyrysady. Kezdeisoq adam bulai istemese kerek. Eger kezdeisoq adam ustalsa, olardyń jeke tulǵasyn anyqtaǵan soń biz azamattardan keshirim suraimyz», - dedi S.Ázirbek.
Aita ketý kerek, búgin politsiia ekstremistik qozǵalysty nasihattaǵany úshin birneshe adamdy ustaǵan bolatyn.
