© Photo: Prezidenttiń baspasóz qyzmeti
Astanada ótip jatqan Túrki memleketteri uiymynyń sammitinde Ózbekstan prezidenti Shavkat Mirziioev Izrail-Palestina qaqtyǵysy boiynsha ortaq ustanymdy jariialaýdy usyndy, dep habarlaidy Sputnik Qazaqstan.
Jiyn basynda Qazaqstan prezidenti Qasym-Jomart Toqaev aldymen uiym tóraǵasy – Ózbekstan eliniń basshysyna sóz berdi. Shavkat Mirziioev Izrail-Palestina qaqtyǵysy boiynsha uiymnyń ortaq ustanymyn jariialaýǵa shaqyrdy.
"Taiaý Shyǵystaǵy Palestina-Izrail qaqtyǵysy bárimizdi qatty alańdatyp otyr. Ol jaqta beibit turǵandar arasynda qaza bolǵandar men jaraqat alǵandar kúrt ósti. Ásirese, balalar, áielder men egde jastaǵy adamdar kóp. Osy oraida eki tarapty shuǵyl áskeri qimyldy toqtatýǵa shaqyramyz. Gýmanitarlyq maqsatta bitimge kelý kerek. Osy problemany sheshýdiń ádil joly - "eki halyqqa eki memleket" ustanymy. Birikken Ulttar Uiymynyń qararlaryna sáikes, Palestina halqy táýelsiz memleket qurýǵa quqyly. Biz uiym sheńberinde álemge osy másele boiynsha biraýyzdan kelisilgen túbegeili ustanymymyzdy jariialaýymyz qajet", - dedi Ózbekstan basshysy.
Aita keteri, mereitoilyq sammitke Túrkiia prezidenti Redjep Erdoǵan, Ózbekstan basshysy Shavkat Mirziioev, Qyrǵyzstan prezidenti Sadyr Japarov pen Ázerbaijan basshysy Ilham Áliev keldi. Uiymǵa baqylaýshy mártebesimen kirgen Túrikmenstannan Halyq máslihatynyń tóraǵasy Gýrbangýly Berdimuhamedov, al Majarstannan osy eldiń premer-ministri Viktor Orban qatysyp otyr.
