Ózbekstan prezidenti Shavkat Mirziiaevtiń kúieýbalasy Oibek Týrsýnov biýdjet qarjysyna Montblanc keńse zattaryn alǵan. Ol bul zattarǵa 51 mln som (6222 dollar) jumsaǵan. Bul týraly Azattyqtyń Ózbek qyzmetine túsken qujatta kórsetilgen.
Satyp alý kelisim-shartyna sai, Montblanc jabdyqtaryna jumys ústeline qoiatyn zattar, press-pape, qalam salǵysh, sharik qalamdar, jai qalamdar, fotoramkalar kiredi. Týrsýnov bul zattardy 2018 jyly memlekettik satyp alý arqyly alǵan.
Azattyqtyń Ózbek qyzmetiniń dereginshe, bul ýaqytta Oibek Týrsýnov Prezident ákimshiligi qarjylyq-sharýashylyq departamenti memlekettik rezidentsiialardy basqarý direktsiiasynyń direktory bolǵan. Týrsýnovtyń bul qyzmeti jaily aqparat resmi túrde aitylmady. Qazir ol bul qyzmetti atqarar-atqarmaityny belgisiz.
Jýrnalister keńse zattary Montblanc kompaniiasynan tikelei alynbaǵanyn, Kim N.S. esimdi "jeke kásipkerden" alǵanyn anyqtaǵan.
Mirziiaevtiń ekinshi kúieýbalasy – Otabek Ýmarov – prezident qaýipsizdik qyzmeti jetekshisiniń orynbasary qyzmetinde isteidi.
Buǵan deiin jýrnalister Otabek Ýmarovtyń Tesla kóligimen túnde júitkigenin jáne erejesiz jekpe-jekke qatysatyn sportshynyń fýtbolkasyn 100 myń dollarǵa satyp alǵanyn jazǵan.
Ózbekstanda prezident ýádesine qaramastan áli kúnge deiin sheneýnikterdiń tabys deklaratsiiasyn jariialaityn zań qabyldanǵan joq.
