ٶزبەكستان پرەزيدەنتٸ شاۆكات ميرزيياەۆتٸڭ كٷيەۋبالاسى ويبەك تۋرسۋنوۆ بيۋدجەت قارجىسىنا Montblanc كەڭسە زاتتارىن العان. ول بۇل زاتتارعا 51 ملن سوم (6222 دوللار) جۇمساعان. بۇل تۋرالى ازاتتىقتىڭ ٶزبەك قىزمەتٸنە تٷسكەن قۇجاتتا كٶرسەتٸلگەن.
ساتىپ الۋ كەلٸسٸم-شارتىنا ساي, Montblanc جابدىقتارىنا جۇمىس ٷستەلٸنە قوياتىن زاتتار, پرەسس-پاپە, قالام سالعىش, شاريك قالامدار, جاي قالامدار, فوتورامكالار كٸرەدٸ. تۋرسۋنوۆ بۇل زاتتاردى 2018 جىلى مەملەكەتتٸك ساتىپ الۋ ارقىلى العان.
ازاتتىقتىڭ ٶزبەك قىزمەتٸنٸڭ دەرەگٸنشە, بۇل ۋاقىتتا ويبەك تۋرسۋنوۆ پرەزيدەنت ەكٸمشٸلٸگٸ قارجىلىق-شارۋاشىلىق دەپارتامەنتٸ مەملەكەتتٸك رەزيدەنتسييالاردى باسقارۋ ديرەكتسيياسىنىڭ ديرەكتورى بولعان. تۋرسۋنوۆتىڭ بۇل قىزمەتٸ جايلى اقپارات رەسمي تٷردە ايتىلمادى. قازٸر ول بۇل قىزمەتتٸ اتقارار-اتقارمايتىنى بەلگٸسٸز.
جۋرناليستەر كەڭسە زاتتارى Montblanc كومپانيياسىنان تٸكەلەي الىنباعانىن, كيم ن.س. ەسٸمدٸ "جەكە كەسٸپكەردەن" العانىن انىقتاعان.
ميرزيياەۆتٸڭ ەكٸنشٸ كٷيەۋبالاسى – وتابەك ۋماروۆ – پرەزيدەنت قاۋٸپسٸزدٸك قىزمەتٸ جەتەكشٸسٸنٸڭ ورىنباسارى قىزمەتٸندە ٸستەيدٸ.
بۇعان دەيٸن جۋرناليستەر وتابەك ۋماروۆتىڭ Tesla كٶلٸگٸمەن تٷندە جٷيتكٸگەنٸن جەنە ەرەجەسٸز جەكپە-جەككە قاتىساتىن سپورتشىنىڭ فۋتبولكاسىن 100 مىڭ دوللارعا ساتىپ العانىن جازعان.
ٶزبەكستاندا پرەزيدەنت ۋەدەسٸنە قاراماستان ەلٸ كٷنگە دەيٸن شەنەۋنٸكتەردٸڭ تابىس دەكلاراتسيياسىن جارييالايتىن زاڭ قابىلدانعان جوق.
