Qashqadariia, Ferǵana jáne Horezm oblystarynyń basshylary Prezident Shavkat Mirziiaevtiń synynan keiin halyqtan keshirim surady.
Úsh ákimniń halyqtan keshirim suraǵan videolary áleýmettik jelide tarady.
Ferǵana oblysynyń basshysy Shýhrat Ganiev Rishtan aýdanynyń turǵyndarymen kezdesip, bul aýdanda baspanalar zańsyz súrilgenin moiyndap, halyqtan keshirim surady. Ol aýdanda úilerdi zańsyz súrýge qatysy bar 14 qyzmetker jumystan alynǵanyn aitty.
Ferǵana oblysy basshysynan soń Qashqadariia aimaǵynyń ákimi Zafar Rýziev ta halyqtan keshirim surady.
«Iakkabag aýdanynda bolǵan jaitqa oblys jáne aýdan ákimshiligi kináli. Úkimetten, memleketten, halqymnan, jýrnalisterden, kásipkerlerden myń márte keshirim suraimyn» dedi Zafar Rýziev.
20 shildede Iakkabag aýdanynda kásipker aýdan ákiminiń orynbasary Mansýr Týimaevti benzinmen órtemek bolǵan. Azattyqtyń Ózbek qyzmetiniń habarlaýynsha, kásipker osy arqyly kreditke salǵan eki qabatty dúkeni men tsehin súrýden qorǵamaq bolǵan. Al ákim orynbasary bul ǵimaratty óz betinshe súrip tastamaq bolǵan. Osy oqiǵadan keiin aýdan ákimi Shohmýrol Donaev qyzmetinen ketip, Mansýr Týimaevtiń ústinen qylmystyq is qozǵalǵan.
Horezm oblysynyń basshysy Farhod Ermanov ta Ózbekstan halqynan keshirim surap, aldaǵy ýaqytta barlyq sheshimdi halyqtyń ruqsatymen qabyldaitynyn aitty.
«Sizderdiń qinalǵandaryńyz – bizdiń kinámiz. Bul jaǵdaida - men kinálimin. Bul iste josparmen bastaǵanda, bárin eseptep alǵanda, sizdermen aqyldasqanda jaǵdai ýshyqpas edi. Aldaryńyzda turyp, keshirim suraimyn» dedi Ermanov.
Shildeniń 26-synan 27-sine aýǵan túni Horezm oblysy Úrgenshi aýdanynda úileri súrilgen myńdaǵan turǵyn joldy jaýyp, bilikten ótemaqy talap etken. Úisiz qalǵan 400-den astam turǵyn birneshe ai boiy qoldan kúrke jasap, sonda kúneltken. 27 shildede Úrgenshige Ózbekstan Premer-ministri Abdýlla Aripov kelgen. Ertesinde úileri súrilgen turǵyndarǵa ótemaqy berilgen.
2 tamyzda selektorlyq jinalysta Ózbekstan Prezidenti Shavkat Mirziiaev turǵyndardyń úii jappai súrilgen úsh oblystyń ákimin synǵa alǵan. Ol úsh ákim halyqtan keshirim suraýy tiis degen.
