Ádilet ministri Qanat Mýsin ulttyq ziiatkerlik menshik institýtyna jiberilgen tekseristiń aiaqtalýǵa jaqyn ekenin málimdedi, dep habarlaidy Sputnik Qazaqstan.
"Tekseris júrgizildi. Osy bir-eki kúnniń ishinde bitedi. Nátijesin bekitemiz de, shara qoldanamyz", - dedi Mýsin jýrnalisterge bergen suhbatynda.
Al tilshilerdiń "Sonda shaǵymda jazylǵan faktiler rastaldy ma?" degen suraǵyna: "Joq",- dep qysqa ǵana jaýap berdi.
Aita keteri, buǵan deiin áleýmettik jelide ulttyq ziiatkerlik menshik institýtynda jumys isteitin qyzmetkerdiń videosy taraǵan bolatyn. Kólik júrgizýshisi RMK-da áielder qaýymyn quttyqtaý úshin árbir qyzmetkerdi 15 myń teńgeden tapsyrýǵa májbúrlegenin málimdedi.
Onyń aitýynsha, aqshaǵa stritiz-shoý uiymdastyryldy. Al qarsylyq bildirgen qyzmetkerge qysym jasalyp, eshbir sebepsiz jumystan shyǵarýǵa tyrysqan.
28 naýryzda Mýsin korporativtegi stritiz-shoý boiynsha tekseristiń bastalǵanyn aitqan. Ministr tekseristen keiin barlyq kináli adamnyń jazasyn alatynyna sendirdi.
Ulttyq ziiatkerlik menshik institýty ádilet ministrligine qaraidy. Mekeme ónertabysqa, paidaly modelge, ónerkásiptik úlgige patent berýge, taýar men qyzmet kórsetý tańbasyn, taýar shyǵarylatyn jerlerdiń ataýlaryn memlekettik tirkeýge jáne oǵan airyqsha quqyqty usynýǵa ótinimderdiń saraptamalyq qorytyndysyn jasaidy.
Sonymen birge buryn tirkelgen taýar shyǵarylatyn jerlerdiń ataýyna airyqsha quqyqty usynýǵa ótinimderdiń saraptamasyn júrgizedi.
