QR Bilim jáne ǵylym ministri Ashat Aimaǵambetov JOO basshylaryn qaǵazbastylyqtan arylýǵa shaqyrdy, dep habarlaidy QazAqparat.
«Qaǵazbastylyqtan arylý máselesin tek mektep tóńireginde sheship qana qoimai, mektepke deiingi uiym, kolledj ben JOO-larda da qarastyrý kerek. Iaǵni, máselege keshendi qaraǵan abzal. Sol sebepti bul baǵyttaǵy jumys bilim berýdiń barlyq deńgeii boiynsha júrgiziledi», - dedi Ashat Aimaǵambetov ýniversitet basshylarymen ótkizgen onlain rejimdegi jiynda.
Ministrdiń aitýynsha Bilim jáne ǵylym ministrligi mektep direktorlary men JOO rektorlarynan talap etiletin qujattardyń tizimin qarastyryp, taldap jatyr.
«Olardyń jartysyn qarastyryp, kóbin alyp tastadyq. Iaǵni kóbi aldaǵy ýaqytta talap etilmeidi. Máselen JOO-larǵa keler bolsaq, olardan kafedra jumysynyń josparyn endi suramaimyz. Sol sekildi emtihandyq vedomstvolar, qorytyndy attestattaý ótkizý otyrysynyń túpki hattamasyn, biliktilik tapsyrý boiynsha ótken otyrystyń qorytyndy hattamasyn da suramaityn bolamyz. Bizdiń oiymyzsha, bul jumystar BǴM qadaǵalap otyratyn mindetter emes. Ministrlik strategiialyq máselelerge nazar aýdarýy kerek. JOO basshylaryn osy rette bizdiń izimizben kereksiz qujattardyń bárin alyp tastaýǵa shaqyramyz. Barynsha azaitýymyz kerek», - dedi ol.
Eske sala ketsek buǵan deiin QR Bilim jáne ǵylym ministri Ashat Aimaǵambetov balabaqsha, mektep pen kolledjde qaǵazbastylyqtan arylatyn kún kelgenin málim etken bolatyn. Ministrdiń aitýynsha pedagogty qosymsha qujat toltyrýǵa mindettegenderge iri kólemde deiin aiyppul salý kózdelgen.
