Qazaqstanda vaktsina saldyrmaǵan jasóspirimder mektepke kirgizilmeidi degen málimetke qatysty elimizdiń Densaýlyq vitse-ministri Ajar Ǵiniiat túsinikteme berdi, dep habarlaidy QazAqparat.
«Vaktsinany balalarǵa mindettep salǵyzady dep jatqan ata-analarǵa aitarym, ýaiymdamańyzdar. Sheshimdi sizder qabyldaisyzdar, eshkim ata-ananyń ruqsatynsyz balaǵa ekpe salmaidy. Degenmen oilanýǵa shaqyramyz, aldymen balanyń densaýlyǵyn. Osy oraida men sizderge statistikany keltirip keteiin. Búgindi tańda elimiz boiynsha 15 myń bala koronavirýs infektsiiasynyń orta aýyr jáne aýyr túrine shaldyǵyp, em aldy. Sondai-aq, 44 bala atalǵan indettiń jeńil túrimen aýyryp shyǵyp, keiin qaita juqtyrý jaǵdaiy tirkelip otyr. Ókinishtisi sol, balalar koronavirýspen ǵana kúresip jatqan joq, ony juqtyrý saldarynan basqa aýrý túrlerin asqyndyryp alyp jatyr», - dedi Ajar Ǵiniiat tanymal telejúrgizýshi Láilá Sultanqyzyna bergen suhbatynda.
Sondai-aq, vitse-ministr balalarǵa kúshtep nemese mindettep vaktsina salady degenniń qur qaýeset ekenin aitty.
«Vaktsina almaǵan balalardy mektepke kirgizbei qoiady degen jalǵan. Bizde ondai maqsat joq. Búginde elimizde 26 myńnan astam bala ekpe salǵyzdy. Men osy kúnderi birqatar emhana men mektepte boldym, sonda ata-anasymen kelip vaktsina alyp jatqan balalardyń qarasy barshylyq»,- deidi ol.
