Kollaj: azattyq-ruhy.kz
Ýkrainanyń Býcha qalasynda tigilgen kiiz úige Qazaqstan elshiliginiń qatysy joq. Jekemenshik qazaqstandyq kompaniialardyń bastamasy. Bul týraly Qazaqstan Syrtqy ister ministrliginiń resmi ókili Aibek Smadiiarov málimdedi, dep habarlaidy Sputnik Qazaqstan.
Úkimet kýlýarynda Smadiiarov Býchadaǵy aktsiiany qazaqstandyq biznesmender uiymdastyrǵanyn aitty.
"Kiiz úi qoiyldy, budan qandai problema týyndady. Bul jeke qazaqstandyq kompaniialardyń bastamasy. Ózderi aparyp, ózderi jinap, ózderi kómektesip jatyr. Kiiz úi degen tez jinalatyn, ornyn aýystyra salatyn úi. Sondyqtan bizdiń biznesmender ýkrain halqyna kómektesý úshin osyndai bastama kótergen", - dep túsindirdi Smadiiarov.
Onyń aitýynsha, Qazaqstannyń Syrtqy ister ministrligi kiiz úiden eshqandai problema kórip turǵan joq.
Bul rette ol Qazaqstanda 300 myńǵa jýyq ýkrain diasporasy turatynyn, Ýkraina aýmaǵynda da Qazaqstannyń diasporasy bar ekenin atap ótti.
"Olar bir-birimen aralasady. Ultaralyq otbasylar bar, bir-birine kómektesedi. Árine, qazir Ýkrainada jaǵdai qiyn, sondyqtan bul aqparat qazir basqasha kórinip jatqan shyǵar. Biraq biz budan eshqandai problema kórip turǵan joqpyz", - dedi Smadiiarov.
Buǵan deiin Resei SIM resmi ókili Mariia Zaharova Ýkrainanyń Býcha qalasynda "myzǵymastyq kiiz úii" tigilgenine nazar aýdarǵan edi. Ol Qazaqstannyń syrtqy ister ministrliginen osy máselege qatysty resmi túsinikteme berýdi surady.
