Foto: Pexels.com
Qazaqstanda joǵary jalaqysyna qaramastan geolog mamandardyń tapshylyǵy áli de baiqalady. Bul týraly QR Indýstriia jáne qurylys ministrliginiń Geologiia komitetiniń tóraǵasy Erlan Aqbarov málimdedi, dep habarlaidy Tengrinews.kz.
Aqbarovtyń aitýynsha, geologiialyq kadrlardyń basym bóligi qazir aǵa býyn ókilderinen quralǵan.
«Biyl biz shamamen 3 myń stýdent daiyndadyq. Alaida geolog mamandardyń tapshylyǵy áli de seziledi. Óitkeni bizde jer qoinaýyn barlaý jumystary qarqyn alýda, sol sebepti geolog mamandyǵyn nasihattaý jumystaryn júrgizýdemiz. Jyl saiyn «Jas geolog» olimpiadasy ótkiziledi, onda jetekshi úsh joǵary oqý orny úsh granttan usynady», – dedi Aqbarov OKQ brifinginde.
Geologiia komitetiniń tóraǵasy geolog mamandarǵa jyl saiynǵy qajettilikti de atap ótti.
«Kadr tapshylyǵy ásirese keibir óńirlerde, mysaly, eldiń shyǵysynda erekshe baiqalady. Onda da belsendi barlaý jumystary júrip jatyr. Bizdiń geologtar, negizinen, aǵa býyn ókilderi, birneshe uiymdarda jumys isteidi. Geologtarǵa jyl saiynǵy qajettilik 2 myńnan astam mamandy quraidy. Negizinen jer qoinaýyn paidalanýshylar tájiribeli geologtardy jumysqa alǵysy keledi. Keibir iri kompaniialar jas mamandardy tárbielep, daiyndaidy, al shaǵyn kompaniialar tájiribeli mamandardy talap etedi», – dedi ol.
Erlan Aqbarov geologtardyń jalaqysyn da atap ótti, onyń aitýynsha, bul salada jalaqy óte básekege qabiletti.
«Qazirgi ýaqytta geolog mamandyǵy elimizdegi eń joǵary aqy tólenetin mamandyqtardyń biri bolyp tabylady. Tájiribeli geologtyń eń tómengi jalaqysy 1 million teńgeden asady. Al jas geolog shamamen 300 myń teńgeden kem almaidy dep oilaimyn», – dep qorytyndylady Aqbarov.
