IIM ákimshilik politsiia komitetiniń tóraǵasy Maqsat Baibolov sailaý kezinde qoǵamdyq tártipti saqtaý sharalaryn túsindirdi, dep habarlaidy Sputnik Qazaqstan tilshisi.
"Sailaý ótetin kúni barlyq óńirde tártipti qadaǵalaý sharalary júrgiziledi. Bul – zań talaby. Negizi, artyq shyǵyndar shyqpaidy degen jospar bar. Munyń bári qoǵamdyq tártipke bólinetin qarajattyń esebinen bolady. Óńirlerden qosymsha kúsh tartylmaidy. Árbir óńirlik organ ózi ornalasqan jerde tártipti baqylaityn bolady", - dedi Baibolov búgingi baspasóz máslihatynda.
Onyń aitýynsha, elordaǵa da qosymsha kúsh tartylmaidy. Sailaý kezinde qalada 20 myńǵa jýyq politsei qoǵamdyq tártipti saqtaidy.
"Negizi, Nur-Sultanda qoǵamdyq tártipti saqtaý úshin qyzmetkerler sany jetkilikti. Sondyqtan basqa óńirlerden politseilerdi tartpaimyz. Máselen, elordada sailaý ýchaskelerinde 19 myń politsei bolsa, taǵy qosymsha qyzmetkerler biýlletenderdi kúzetýge jiberiledi. Al kóshelerde 10 myńnan astam quqyq qorǵaýshy qoǵamdyq tártipti qadaǵalaidy", - dep atap ótti Baibolov.
Komitet basshysy miting máselesine qatysty suraqqa da jaýap berdi. Onyń sózine qaraǵanda, búginde arnaiy daiyndyq júrgizilip jatqan joq. Barlyq shara kúsheitilgen rejimge sai atqyrylady.
"Birinshiden, ruqsat etilmegen miting bolsa, bizdiń negizgi mindetimiz – qoǵamdyq tártipti saqtaý. Ondai sharalar kez kelgen jaǵdaida atqarylady. Sailaý kúni adamdardyń kóp jinalýyna basymdyq bermeimiz. Biz bárin jospar boiynsha atqaratyn bolamyz. Árine, ishimdik ishý, qoǵamdyq orynda mas kúide júrý siiaqty tártip buzýshylyq bolsa, mindetti túrde shara qoldanamyz", - dep atap kórsetti Baibolov.
Onyń aitýynsha, búginde naqty nusqaý bar. Quqyq qorǵaýshylar qoǵamdyq tártipti qadaǵalaýǵa shyqqanda arnaiy qural-jabdyqtaryn da alyp shyǵady. Bunyń bári normativtik-quqyqtyq aktilermen bekitilgen.
"Zańda qarýdy jáne arnaiy qural-jabdyqtardy qoldaný sharttary jazylǵan. Dál qazir atap aita almaimyn. Óitkeni qatelesýim múmkin. Biraq zańǵa baǵynbaý nemese azamattardyń ómiri men densaýlyǵyna qaýip tóndirý siiaqty áreketter bolsa, arnaiy qural-jabdyqtardy qoldanýǵa ruqsatymyz bar", - deidi Baibolov.
