Densaýlyq saqtaý ministrligi men óńirlerdiń koronavirýs boiynsha statistikasy nege sáikespeidi? Bul suraqqa búgin Ortalyq kommýnikatsiialar qyzmetinde ótken baspasóz máslihatynda Densaýlyq saqtaý ministri Aleksei Tsoi jaýap berdi, dep habarlaidy QazAqparat tilshisi.
«Óńirlerdiń statistikasy týraly aitar bolsaq, bul jaǵdaidan habarymyz bar. Atalmysh máseleni retteý úshin bizdiń arnaiy brigadalar men monitoringilik toptar aimaqtarǵa baryp, jergilikti jerdegi jaǵdailardy óz kózimen kórdi. Málimettiń keide rasynda da tirkelip (qate tirkelip) jatqanyn kórip, sebepterin anyqtadyq. Mundaǵy basty sebepterdiń biri – zerthanalardyń tolyq integratsiiasynyń bolmaýy. Iaǵni jeke zerthanalardyń bir bóligi biryńǵai aqparattyq júiege engizilmegen. Keiingi kezde bul baǵyttaǵy jumysty rettep, jeke zerthanalar biryńǵai aqparattyq júiege kiriktirile bastady», - dedi Aleksei Tsoi.
Ministr sonymen qatar keibir meditsinalyq uiymdar málimetterdi keshigip berýdiń saldarynan osyndai olqylyqtar oryn alǵanyn aitady.
«Osy máselelerdiń bárin taldap, jergilikti jerlerdegi jaýapty azamattarǵa ákimshilik sógis berildi. Bul másele bizdiń erekshe baqylaýymyzda tur», - dedi ol.
