Májilis depýtaty Iýliia Kýchinskaia Oqý-aǵartý ministri Ashat Aimaǵambetovtiń atyna depýtattyq saýal joldap, muǵalimderdiń ailyǵyn keshiktermei tóleýdi surady, dep habarlaidy QazAqparat.
«Keiingi birneshe kúnde depýtattardyń atyna muǵalimderden kóptegen ótinishter túsip jatyr. Olar ailyqtary, eńbek demalysynyń aqysy, emdelý ótemaqysy keshigip jatqanyn aityp, kómek suraýda», - dedi Májilis ókili.
Onyń deregi boiynsha, 1 maýsymda eldegi 300 myńdai muǵalim jazǵy eńbek demalysyna shyqqan.
«Sizdiń vedomstvo mamandarynyń biýdjet josparlaýǵa salǵyrt qaraýynyń saldarynan qarajat tapshylyǵy týyndap otyr. Onyń salarynan pedagogterdiń bir bóligi mamyr aiynyń ailyǵyn tolyq kólemde ala almai otyr. Onyń ústine eńbek demalysynyń aqysy men emdelý ótemaqysynyń qaryzy 30 mlrd teńgege jetken. Pedagogterdiń bul shaǵymy ádiletti bolǵanyna qaramastan, ministrlik jumǵan aýzyn ashpai otyr», - degen depýtat ministr Ashat Aimaǵambetovten atalǵan máseleni keshiktirmei sheshýdi surady.
