Qazaqstan Respýblikasy Din isteri jáne azamattyq qoǵam ministrligi Din isteri komiteti birqatar BAQ betterinde elimizdegi meshitterde resmi ýaǵyzdardan keiin qosymsha túrde onyń orys tilinde túsiniktemesi aitylýy qajet degen másele tóńireginde týyndaǵan talqylaýlarǵa qatysty málimdeme jasady.
Qazaqstan Respýblikasy Parlamenti Májilisinde ótken ekstremizm men terrorizmniń aldyn alý máselelerine arnalǵan dóńgelek ústelde jekelegen meshitterde ýaǵyzdardan keiin imamdardyń orys tilin paidalanýy týraly másele Ministrlik tarapynan emes, osy sharaǵa qatysýshylardyń birimen kóterilgen bolatyn. Sáikesinshe, QR Din isteri jáne azamattyq qoǵam ministri atalǵan is-shara barysynda osy másele tóńireginde jýrnalister tarapynan suraqtar qoiylǵannan soń birshama túsinikteme bergen bolatyn.
Ministrlikke islamǵa qyzyǵýshylyq tanytyp júrgen birqatar dindarlardyń meshit imamdarynyń ýaǵyzdaryn tolyq túsinbeitini týraly el azamattarynan ótinishter túsip otyrady. Ótinishterde sondai dindarlardyń osy sebepti islam týraly aqparatty Qazaqstan musylmandary dini basqarmasynyń resmi kózderinen tys jerlerden, onyń ishinde teris dini aǵymdardyń ustanýshylarynan alýǵa májbúrlik tanytatyny týraly aitylady. Sáikesinshe, ótinish jasaýshy azamattar halyqaralyq tájiribeni eskere otyryp meshit imamdary resmi ýaǵyzdardan keiin qazaq tilin aitarlyqtai meńgermegen azamattar úshin orys tilinde túsindirme berýdi usynady.
Osy rette, atalǵan másele turǵyndarynyń quramy kóptegen ulttardan turatyn eldimekenderdegi jekelegen meshitterge ǵana qatysty ekendigin aita ketýimiz kerek.
Ministrlik, óz kezeginde, azamattardan túsip otyrǵan kez-kelgen ótinishterdi qarastyrýǵa jáne olardy taldap otyrýǵa mindetti. Osy oraida Ministrlik quziretine Qazaqstan musylmandary dini basqarmasynyń ishki máseleleriniń sheshimin tabý kirmeitinin aita ketkimiz keledi. Sondyqtan joǵaryda atalyp otyrǵan másele boiynsha meshitterge kelýshilerdiń pikirlerin eskere otyryp sheshim qabyldaýy tiis Qazaqstan musylmandary dini basqarmasyna habarlasýdy usynamyz.
QR Din isteri jáne azamattyq qoǵam ministrligi Din isteri komiteti elimizdiń Konstitýtsiiasynda kepildik berilgen sóz bostandyǵyna qurmetpen qarai otyryp, otandyq buqaralyq aqparat quraldaryn din tárizdi ótkir salada týyndap otyratyn máseleler týraly ekiudai aqparat berýge jol bermeýge jáne turǵyndarǵa shynaiy aqparatty durys jetkizýge shaqyrady.
