Foto: egemen.kz
12 qarashada ótken Májilis otyrysynda depýtaty Ashat Aimaǵambetov Jasandy intellekt jáne tsifrlyq damý ministrliginiń ókiline balalardyń áleýmettik jelilerde tirkelýine jas shekteýin engizý, oqýshylardyń mektepterde smartfon qoldanýyna shekteý qoiý máseleleri jóninde suraq qoiyp edi, ministrlik eshqandai shekteý qarastyryp otyrmaǵanyn aitty, dep habarlaidy Ult.kz.
"Qazaqstanda bala TikTok nemese Instagram-ǵa mysaly 5–6 jastan bastap esh kedergisiz tirkele alady — tipti ata-anasynyń kelisiminsiz ári eshqandai verifikatsiiasyz. Sosyn ol kez kelgen kontentke tolyq qol jetkize alady. Al kóptegen elderde bul másele zańmen rettelgen. Mysaly, Daniia men Avstraliiada tirkelýge ruqsat jasy — 15–16 jas. AQSh, Ulybritaniia jáne Irlandiiada da shekteýler engizilgen: jas boiynsha jyne áleýmettik jelige tirkelý tek ata-anasynyń rastalǵan kelisimimen ǵana júzege asady. Tsifrlyq damý ministrligi men Oqý-aǵartý ministrligi osy másele boiynsha pozitsiiasy bar ma?" — dedi depýtat.
Aimaǵambetovtiń suraǵyna jaýap bergen Jasandy intellekt jáne tsifrlyq damý ministrliginiń ókili Dmitrii Mýn qazirgi kezde álemde kerisinshe balalarǵa túrli áleýmettik jelige tirkelýge ruqsat berilýde, biraq olarda shekteý bar ekenin aitady. Onyń sebebi qoǵamnyń damýyn tejemei, baqylaý. Bizdiń ministrlik te osy baǵytty ustanbaq.
Depýtattyń ekinshi suraǵy mektepterde smartfon qoldanýǵa memlekettik ustanym bar ma ekendigi tóńireginde boldy. Ashat Aimaǵambetov taǵy da shet memleketterdi mysalǵa keltirip:
"Angliia, Niderland jáne álemniń 40%-dan astam elderi mektepterde smartfon qoldanýǵa resmi túrde tyiym salǵan. Qazaqstanda da birqatar aldyńǵy qatarly mektepter — NIS, BIL, «Daryn»- sabaq kezinde smartfon qoldanýǵa shekteý qoidy. Nátijesi óte jaqsy. Oń áseri baiqaldy: balalar belsendirek, bir-birimen jii tildesedi, sabaq kezinde alańdaýshylyq azaidy. Alaida eldegi kóptegen mektepterde jaǵdai ózgeshe: muǵalimder janjaldan qorqady, al oqýshylar sabaq pen úzilis kezinde TikTok-ta saǵattap otyrady. Tsifrlyq damý jáne Oqý-aǵartý ministrlikteri bul máseleni júieli túrde sheshý úshin qandai usynystary bar?", — dedi ol.
Bul suraqqa da jaýap bergen Jasandy intellekt jáne tsifrlyq damý ministrliginiń ókili bul másele jańa Kodekste qarastyrylmaǵanyn málimdedi.
"Ministrliktiń ustanymy — jańa urpaqty telefondy durys paidalanýǵa úiretý jáne olardyń jańa tehnikany, jasandy intellektini jáne internetti jumys barysynda paidalanýda artta qalmaýyn qadaǵalaý", — dedi vedomstvo ókili Dmitrii Mýn .
Aita keteiik, 12 qarashada Qazaqstan Respýblikasy Parlamentiniń tómengi palatasynda Qazaqstan Respýblikasynyń Tsifrlyq kodeksi qaraldy.
