QR Aqparat jáne qoǵamdyq damý vitse-ministri Daniiar Esin mediatsiia institýtyn keńinen damytýdy tejep turǵan problemalardy atady, dep habarlaidy QazAqparat.
«Búginde mediatsiia institýtynyń keńinen damýyn jáne ony qoldanýdy tejep turǵan problemalar bar. Olardyń arasynda halyqtyń mediatsiia rásimderi týraly jetkilikti habardar bolmaýy men oǵan degen senimniń tómendigi. Áleýmettik saýalnama nátijesine súiensek, suralǵan adamdardyń tek 36 paiyzy mediatsiia jaiynda biledi», - dedi Daniiar Esin Senatta mediatsiia zańnamasyn jetildirý taqyrybyna arnalǵan dóńgelek ústel otyrysynda.
Mamandardyń paiymynsha, mediatsiia rásimderine halyqtyń senimin arttyrý úshin azamattyq daýlar men ákimshilik ister boiynsha sotqa deiingi kezeńde mindetti túrde mediatormen aqparattyq keńes júrgizýdi engizý qajet.
«Mediator jumysy daýdyń bastapqy kezeńinde ony tiimdi ári der kezinde retteýge múmkindik beredi, sondai-aq sottarǵa, ishki ister organdary men prokýratýraǵa júktemeni azaitady», - dep túsindirdi D. Esin.
Sonymen qatar ol kásibi mediatorlardy daiarlaý sapasy máselesine nazar aýdardy.
«Búginde daiarlaý baǵdarlamasy boiynsha oqýdan ótkenin rastaityn sertifikaty barlar kásibi mediator bola alady. Osyǵan bailanysty qazirgi jaǵdaidy eskere otyryp, mediatorlardy daiarlaý erejesin qaita qaraý usynylady», - dedi vitse-ministr.
Onyń aitýynsha, búginde Qazaqstanda mediatorlardy daiarlaý boiynsha 120-dan astam qoǵamdyq ortalyq tirkelgen. Alaida olarda biryńǵai baǵa saiasaty, biryńǵai ádistemelik eńbekter men mediatsiia rásimderin júrgizýge arnalǵan sharttar, sondai-aq oqyǵan mediatorlar men berilgen sertifikattardy esepke alatyn biryńǵai organ joq.
