Aqparat jáne qoǵamdyq damý ministrligi LinkedIn internet resýrsynyń buǵattalýyna sebep bolǵan jaitty atady, dep habarlaidy "Ult aqparat".
Vedomstvo taratqan málimet boiynsha, eldegi aqparat alańyna turaqty júrgiziletin monitoring kezinde LinkedIn resýrsynda internet-kazino jarnamalaý, naqty adamdardyń atynan ashylǵan jalǵan akkaýnttardy tirkeý siiaqty Qazaqstan zańnamasyna qaishy faktiler anyqtalǵan.
Ministrliktegilerdiń aitýynsha, mundai áreketter eldegi zańnamaǵa ǵana emes, atalǵan internet resýrstyń ishki erejelerine de qaishy.
Naqty aitsaq, resýrsty pailanaý týraly kelisimde «qatysýshylar jariialanǵan aqparattyń senimdi jáne zańdy bolýy kerektigi» jáne «úshinshi tarapqa tiesili quqyqtardy buzbaýy kerek ekeni» aitylǵan.
Al resýrstyń jarnama ornalastyrý erejesinde paidalanýshylardy jańylystyrýǵa nemese olarǵa jalǵan aqparat berýge, qumar oiyndardy jarnamalaýǵa tyiym salynǵan.
«Osyǵan bailanysty, belgili bolǵan zań buzý faktileri boiynsha ministrlik QR «Bailanys týraly» Zańynyń 41-1-baby 3-1-tarmaǵynyń talaptarymen LinkedIn internet-resýrsynyń ákimshiligine anyqtalǵan zań buzý faktilerin joiý jáne sonymen bailanysty materialdardy óshirý boiynsha sharalar qabyldaý kerektigin aityp, habarlama jiberdi. Alaida, ókinishke qarai, internet-resýrstyń ákimshiligi zań buzý faktilerin joiý boiynsha sharalar qabyldaǵan joq», - dep jazylǵan Aqparat jáne qoǵamdyq damý ministrliginiń málimetinde.
Joǵaryda aitylǵan «Bailanys týraly» zańnyń 41-1-babynda kózdelgen tártip boiynsha, ministrlik zań buzý faktilerin joimaǵan resýrsty buǵatttaǵan.
LinkedIn ákimshiligi vedomstvo nusqaǵan zań buzý faktilerin joiǵan jaǵdaida resýsrqa qoiylǵan buǵat alynady.
«Ministrlik Qazaqstan zańnamasynyń talaptaryn saqtaý máselesinde árqashan syndarly dialog quryp, internet-resýrs ákimshiligimen yntymaqtastyqty jolǵa qoiý ustanymyn saqtaidy», - dep jazylǵan Aqparat jáne qoǵamdyq damý ministrliginiń aqparatynda.
