QR syrtqy ister ministrliginiń baspasóz hatshysy Aibek Smadiiarov shet elderde túrmede otyrǵan qazaqstandyqtardyń isi ne bolyp jatqanyn aitty, dep habarlaidy Sputnik Qazaqstan.
"Aqjarqyn Turlybai appeliatsiialyq sotty kútip otyr. Sottyń naqty qai kúni ótetini áli kúnge deiin belgisiz. Biz advokattarmen únemi bailanystamyz. Konsýldarymyz túrmege baryp, otandasymyzdyń hálin bilip turady. Onyń túrmedegi jaǵdaiy men tergeýdiń júrgizilýine qatysty eshqandai shaǵymy joq", — degen Smadiiarov qandai da bir aqparat tússe, mindetti túrde habardar etetinin aitty.
Sondai-aq, syrtqy saiasi vedomstvonyń ókili tamyz aiynda Niý-Iorkte ustalǵan úsh qazaqstandyqtyń isine de toqtaldy.
"Men buǵan deiin habarlaǵandai, kezekti sot qazan aiyna belgilengen. Naqty datasy ázirge belgisiz. Búgingi tańda úsh qazaqstandyqtyń ekeýi eshqaida ketpeý týraly qolhatpen bosatyldy. Bireýi qamaýda otyr", — dedi ol.
Aita ketsek, tamyz aiynyń basynda AQSh-ta Qazaqstannyń úsh azamaty iri kólemde alaiaqtyq jasaǵany úshin ustalǵan edi. Olar: Aziza Djavadzade nemese Djalolova, 1994 jyly týǵan; Diora Ashirova, 1991 jyly týǵan jáne Elena Qudaibergenova, 1970 jyly týǵan.
Otandastarymyzdyń internet arqyly raritet kólikterdi satýǵa bailanysty alaiaqtyqqa qatysy bolýy múmkin. Shyǵynnyń jalpy kólemi — 4,5 million dollar.
