Covid-19 indetinen qaitys bolǵan meditsina qyzmetkerleriniń otbasyna 10 mln teńge somasynda ótemaqy tólenip jatyr. Bul týraly Ortalyq kommýnikatsiialar qyzmetinde QR Densaýlyq saqtaý ministrliginiń resmi ókili Baǵdat Qojahmetov málim etti, dep habarlaidy "Ult aqparat".
Osy oraida resmi ókil qaitys bolǵan meditsina qyzmetkerleriniń týystaryna ótemaqyny barynsha jedel tóleýdi qamtamasyz etý úshin tiisti sheshim jasalǵanyn jetkizdi.
«Bul ótemaqy qaitys bolǵan meditsina qyzmetkeriniń týysyna tólenedi, iaǵni tiisti ótinimdi bergen jaqynyna beriledi. Eger muragerlikke úmitker basqa týystary shyqsa, onda bul máseleni qarastyrý Qazaqstan Respýblikasynyń zańnamasy aiasynda iske asyrylady», - dedi B. Qojahmetov.
