QR Úkimetiniń baspasóz ortalyǵynda Memleket basshysynyń «Halyq birligi jáne júieli reformalar – el órkendeýiniń berik negizi» atty Qazaqstan halqyna arnaǵan Joldaýy boiynsha brifing ótti. Eldegi dizel otynynyń qory týraly energetika ministri Maǵzum Myrzaǵaliev aityp berdi, dep habarlaidy "Ult aqparat" primeminister.kz saityna silteme jasap.
«Qazirgi otyn daǵdarysy búgin ǵana oryn alǵan joq. Bizde tamyz aiynan bastap qor qatty azaiyp barady, oǵan egin jinaý jumystary da qosyldy. Sondyqtan, ókinishke orai, elimizdegi munai bazalarynda qor kólemi óte az», — dedi Myrzaǵaliev.
Ministrdiń aitýynsha, negizgi sebep – Qazaqstan men shekaralas elder arasyndaǵy baǵa aiyrmashylyǵy.
«Soliarka boiynsha Qazaqstan men Resei arasyndaǵy aiyrmashylyq 90 teńgege deiin jetedi. Ózbekstan, Qyrǵyzstan siiaqty ońtústiktegi kórshilerimizben aiyrmashylyq shamamen 70-80 teńgeni quraidy», — dep atap ótti ol.
Bul problemany sheshý úshin Resei Federatsiiasynyń Energetika ministrligimen shamamen 100 myń tonna kóleminde dizel otyny importynyń qajetti kólemin bólýge qatysty kelissóz júrgizildi.
Qazirgi tańda JMQS-nyń iri jelilerinde Resei Federatsiiasynyń jetkizýshilerimen kelissózder júrgizilip jatyr. Resei Federatsiiasynyń zaýyttarynan dizel otynyn jóneltý 1-20 qyrkúiek aralyǵynda 5 myń tonnany quraidy, al 21-28 qyrkúiek aralyǵynda shamamen 15 myń tonna dizel otyny tiep jóneltildi.
Sonymen qatar biylǵy jyldyń 1 qazanynan bastap Pavlodar munai óńdeý zaýyty jóndeýge jabylady. Osy ýaqytqa deiin otynnyń jetkilikti mólsherin qalyptastyrý kerek edi. Alaida, osy jyldyń tamyz jáne qyrkúiek ailarynda dizel otynyn tutynýdyń asa qatty ósýine bailanysty (tamyzda – 519 myń tonna, qyrkúiekte 500 myń tonnadan astam bolady dep kútilýde), qor deńgeii jetkiliksiz deńgeide qaldy. Osyǵan bailanysty, Ministrlik iri tutynýshylarǵa, sondai-aq JMQS jelilerine dizel otynynyń jetispeitin kólemin importtaýdy usyndy.
«Búginde zaýyttardan jóneltý josparly rejimde júrip jatyr. Jergilikti atqarýshy organdar – ákimdikterden janarmai quiý beketteri men munai bazalaryn tekserýdi suraimyn. Bireýler kóp aqsha taýyp qalý nietimen soliarkany satpai, ustap otyrýy múmkin. Energetika ministrligi elimizdiń dizel otynynsyz qalmaýy úshin barlyq jaǵdaidy jasaidy», — dedi energetika ministri.
Aita keteiik, munai ónimderiniń naryǵy – joǵary qubylmaly, salyq salý, baǵa belgileý júiesi, Qazaqstanda da, kórshiles elderde de JJM óndirý deńgeii (baqylanbaityn aǵyn), suranystyń maýsymdylyǵy, MÓZ-degi tehnologiialyq irkilister nemese kúrdeli jóndeý jumystary týraly aqparat sekildi kóptegen faktorlardyń áserine ushyraidy.
