Astanada «Zaiyrlylyq qazaqstandyq qoǵamnyń turaqtylyǵynyń negizi retinde» taqyrybynda ótken Qazaqstan dintanýshylarynyń VI forýmynda Din isteri jáne azamattyq qoǵam ministri Nurlan Ermekbaev qazirgi ýaqytta zaiyrly memleket qadiǵasyn ustaný qajettiligin, sondai-aq dini destrýktivti aǵymdardyń aldyn alý mindetteri turǵanyn málimdedi. Bul týraly QMDB-nyń resmi saity habarlady.
Vedomstvo basshysynyń aitýynsha, ministrlik din máseleleri boiynsha zańnamalyq aktilerge ózgerister engizýdi josparlaidy.
«Normativtik-quqyqtyq bazaǵa, din qyzmeti jáne dini birlestikter máseleleri boiynsha keibir zańnamalyq aktilerge jáne sabaqtas zańdarǵa birqatar ózgerister engizýdi josparlaimyz. Qazaqstan musylmandary dini basqarmasy meshit qyzmetkerleriniń biliktiliginiń arttyrý, qarjylyq qamtamasyz etýdegi ashyqtyq boiynsha tiisti sharalardy júrgizýdi kózdeidi» dedi N.Ermekbaev.
Ministr sonymen qatar din salasyndaǵy jaǵdai saiasi jáne qoǵamdyq qaýipsizdik úshin úlken mańyzǵa ie ekenin atap ótti. Dini qyzmetti retteý maqsatynda ministrlik birneshe jylǵa arnalǵan din salasyndaǵy arnaiy tujyrymdamany ázirlemek.
«QR 2017-2020 jyldarǵa arnalǵan din salasyndaǵy Memlekettik saiasat tujyrymdamasy ázirlenýde. Bul qujat el rýhaniiatynyń basty baǵdaryna ainalady, sebebi qazirgi qoǵam osy salany retteýdi qajet etedi. Respýblikanyń ǵylymi-sarapshylyq qaýymdastyq, úkimettik emes uiym jáne dini birlestik ókilderi tujyrymdamany daiyndaýǵa qatysady» dedi Nurlan Ermekbaev.
Budan bólek, ministr vedomstvo ómir súrýdiń zaiyrlylyq úlgisin jáne dini taǵattylyq qundylyqtaryn nazarǵa ala otyryp, halyqqa aqparattyq-túsindirý jumystaryn uiymdastyrýdyń jańa ádis-tásilderin ázirleý jumystaryn da júrgizetinin jetkizdi.
