Aqparat jáne qoǵamdyq damý ministrligi jýrnalistika mamandyǵyn igerip jatqan stýdentterdiń 1-kýrstan bastap memlekettik buqaralyq aqparat quraldarynda (BAQ) óndiristik tájiribeden ótýine kómektesýge daiyn.
Bul týraly búgin media salasynyń mamandaryn daiyndaityn joǵary oqý oryndarynyń rektorlarymen kezdesken QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Shynymen de búgin eń ózekti, kókeitesti máselelerdi ortaǵa salyp, óz usynystaryńyzdy aittyńyzdar. Eń bastysy bizben tyǵyz qarym-qatynasta jumys isteýge nietterińizdi bildirdińizder. Biz ony qýana-qýana qabyldaimyz. Óitkeni, bizdiń ministrlik tek qana aqparat salasynda ǵana emes, jalpy quzireti óte keń memlekettik organ sanalady. Onyń ishinde jastar saiasaty, rýhani jańǵyrý baǵdarlamasyn júzege asyrý máseleleri, din, etnosaiasat máseleleriniń bárin qamtyp otyrǵan birden-bir memlekettik organ. Sondyqtan osy salalardyń barlyǵynda ózderińizben tyǵyz qarym-qatynasta bolýǵa jáne áriptestik ornatýǵa daiynbyz», - dedi kezdesýdi qorytyndylaǵan Aida Balaeva.
Sonymen qatar ministr búgingi bas qosýda talqylanǵan jýrnalistika taqyrybyna toqtaldy.
«Árine, jýrnalistika - kúrdeli mamandyq, kúrdeli ǵylym salasy. Sondyqtan elimizdegi baspasóz jaily aitylatyn áńgime de, zertteitin másele de, jetildiretin tustar da az emes. Baspasózi myqty qoǵamnyń mádenieti men talǵamy da, rýhani deńgeii de azamattyq belsendiligi de joǵary bolady. Osy oraida, joǵary oqý oryndarynyń mamandardy daiyndaýy bilim berý mazmunymen tikelei bailanysty. Al joǵary oqý oryndaryndaǵy oqýdyń mazmundyq sapasyn jańǵyrtý, ony ýaqyt talabyna sai jetildirý máselesi óte ózekti taqyryp. Bul oraida ministrlik oqý materialdarynyń sapasyn qadaǵalap, qajet bolǵan jaǵdaida olardyń mazmundyq jaǵyn birge saralap, birge ázirleý úshin áriptestik ornatýǵa qashanda daiyn», - dedi ol.
Onyń atap ótýinshe, bul óz kezeginde ministrlik pen joǵary oqý oryndary arasyndaǵy yntymaqtastyqty nyǵaityp, stýdentterdiń naqty kásibi deńgeiin kóterýge múmkindik beredi.
«Diplom alyp shyqqan jas jýrnalisterge taǵylatyn synnyń biri - olardyń praktikalyq turǵyda daiyn bolmaýy. Iaǵni, joǵary oqý ornynda beriletin teoriialyq bilimniń praktikamen jalǵaspaýy. Kóp jaǵdaida jas mamandar praktikany jumysqa turǵan soń úirenýge májbúr. Bul oraida stýdenttik praktikalyq daǵdylaryn damytý úshin Aqparat jáne qoǵamdyq damý ministrligi jýrnalistika mamandyǵyn igerip jatqan stýdentterdiń 1-kýrstan bastap memlekettik BAQ-tarda óndiristik tájiribeden ótýine kómektesýge daiyn», - dedi Aida Balaeva.
