QR Densaýlyq saqtaý vitse-ministri Ajar Ǵiniiat burynǵy ministr Eljan Birtanovtyń qamaýǵa alynýyna qatysty pikir bildirdi, dep habarlaidy "Ult aqparat"
«Bul aqparat ministrlik qyzmetshileri úshin aýyr tidi. Quzyrly organdar bul ispen ainalysyp jatqanyn bilesizder. Meniń oiymsha, olar tergeý amaldary barysynda istiń mán-jaiyn anyqtaityn bolady», - dedi vitse-ministr Ortalyq kommýnikatsiialar qyzmetinde qoiylǵan saýalǵa jaýap bere otyryp.
Sonymen qatar tilshi tergeý is-qimyldary Densaýlyq saqtaý ministrligi men onyń qurylymdary jumysyna qanshalyqty áser etkenin surady.
«Jalpy, Densaýlyq saqtaý ministrligi qyzmetshilerine qosymsha júkteme túskeni baiqalyp otyr. Bul turǵyda tergeý organdary qujattardy qarap, tiisti suraqtardy qoiý úshin qyzmetshilerdi shaqyrtyp jatyr», - dedi Ajar Ǵiniiat.
Buǵan deiin áleýmettik jelide burynǵy densaýlyq saqtaý ministriniń ustalǵany týraly habarlama taraǵan bolatyn. Sol kezde qarjy monitoringi komiteti tergeýge qatysty aqparat 201-bapqa sáikes jariialanbaitynyn jáne tiisti málimetti keiin beretinin habarlaǵan.
Al jelidegi aqparat boiynsha eks-ministr 526 million teńge biýdjet qarjysyn jymqyrdy degen kúdikke ilindi. Aqsha densaýlyq saqtaý júiesiniń bailanysyn qamtamasyz etý jáne aqparat platformalaryn satyp alýǵa bólingen. Qylmystyq kodekstiń 189-babyna sáikes ("Senip tapsyrylǵan bóten múlikti iemdenip alý") tergeý júrgizilip jatqany aitylǵan.
3 qarasha kúni qarjylyq monitoring jónindegi komitet tergeý ýaqytynda Eljan Birtanov qamaýǵa alynatynyn málimdedi. Eks-ministr biýdjet qarajatyn asa iri kólemde ysyrap etý faktisi boiynsha aiyptalyp otyr.
