Qazaqstan Ulttyq ekonomika ministrliginiń baspasóz xatshysy Samal Ybyraeva azyq-túlik baǵalarynyń nelikten sharyqtap bara jatqanyn túsindirdi, dep xabarlaidy Ult.kz tilshisi QazAqparat agenttigine silteme jasap.
"Ulttyq ekonomika ministrligi azyq-túliktik taýarlar baǵasynyń ózgerisi týraly árdaiym xabardar etip otyrady. Negizgi nazar, árine, áleýmettik mańyzy bar taýarlarǵa beriledi. Olardyń quny jyl basynan beri nebári 2%-ǵa artqan. Eń kóp qymbattaǵan siyr men qoi eti. Kókónisterden kartop, piiaz ben qyryqqabat baǵalary joǵarylady", - dedi ol OKQ ótken brifingte.
Onyń sózinshe, baǵalardyń ósýine maýsymdyq saqtaýǵa ketetin shyǵyndardyń ulǵaiýy áser etedi. Mal eti baǵasynyń joǵarylaýyna jem-shóp qunynyń kóterilýi yqpal jasaidy, sebebi tasymal barysynda janar-jaǵarmai baǵalary da qymbattai tústi.
"Qazir Ulttyq ekonomika ministrligi taýarlyq qyzmetke qatysty birqatar zańnamalyq ózgeristerdi daiyndady. Olar qasqana baǵa ósirý oqiǵalaryna tosqaýyl qoiýǵa baǵyttalǵan", - dedi ol.
Atap aitqanda, áleýmettik mańyzy bar taýarlarǵa eń joǵary baǵa taǵaiyndaý quzyryn jergilikti bilik enshisine berý kózdelgen. Ministrliktiń bul áreketi baǵanyń kóterilýine jedel nazar aýdarýǵa septigin tigizbek. Sonymen birge azyq-túlik taýarlarynyń baǵasyna qandai sebepter áser etip jatqandyǵyn anyqtaý úshin jergilikti atqarýshy organdar men kásipkerler tyǵyz qarym-qatynasta bolady.
