21 qyrkúiekte Arystaǵy qarý-jaraq joiatyn poligondaǵy jarylysta zardap shekken úsh saperdiń jaǵdaiy aýyr, bireýiniń jaǵdaiy ortasha, altaýynyń hali turaqty. Bul týraly 23 qyrkúiekte Úkimet otyrysynan keiin eldiń Qorǵanys ministri Nurlan Ermekbaev habarlady.
"Arystaǵy qarý-jaraq qoimasynda óte kúrdeli jumystar bastaldy. Osy jumystar barysynda áskeri bólimsheden jarylatyn, jarylmaityn qarý túrleriniń fragmentteri tabylyp jatyr. Oq-dáriler Arystan 60 shaqyrym jerde ornalasqan poligonda joiylyp jatyr. Jergilikti turǵyndarǵa, Arys qalasyna qazir qaýip joq" dedi Ermekbaev.
21 qyrkúiekte Arys qalasynan 60 shaqyrym jerde ornalasqan poligonda oq-dárilerdi joiý kezinde on saper jaralanǵan. Olar áskeri gospitalǵa jetkizilgen.
Aita keteiik, osydan úsh aidai buryn Túrkistan oblysy Arys qalasyndaǵy áskeri qoima jarylyp, tórt adam qaza tapqan. Resmi derek boiynsha, qoimadaǵy oq-dáriniń 70 paiyzdan astamy jarylyp ketken. Qaladaǵy turǵyn úilerdiń basym bóligi búlingen.
Osy oqiǵadan soń eldegi áskeri qoimalardyń jaǵdaiy men qoima mańyndaǵy turǵyndar qaýipsizdigi máselesi kóterile bastaǵan.
Sońǵy on jylda Arys qalasynda áskeri qarý saqtalatyn qoimalarda tórt ret jarylys bolyp, birneshe adam qazaǵa ushyraǵan. Biyl maýsymdaǵy jarylystan keiin Qorǵanys ministrligi áskeri oq-dáriniń "eldimekenderden aýlaq jerge" kóshiriletinin málimdegen.
