Kórkem ádebiettiń balalarǵa qoljetimdi bolýy úshin arnaiy joba ázirlendi. Bul týraly QR Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Bilim jáne ǵylym salasyna qarasty 7096 kitaphana jumys isteidi. Mektepterde – 6461, kolledjderde – 579, joǵary oqý oryndarynda – 56, sondai-aq Respýblikalyq ǵylymi-pedagogikalyq kitaphana qyzmet etýde. Al bilim berý uiymdaryndaǵy jalpy kitap qory – 267 325 289. Sany, árine, kóńil kónshiterlik. Degenmen olardyń qanshasy kórkem ádebiet? Sol kórkem ádebiettiń qanshasy qazaq tilinde? Mektep kitaphanalary jańa kitaptarmen qanshalyqty jii tolyqtyrylady? E. Berroýz, A. Azimov, M. Tven, J. Vern jáne basqa avtorlardyń eńbekteri qazaq tiline aýdarylǵan ba? Bul turǵyda aitarlyqtai problemalar bar», - dep jazdy ministr áleýmettik jelidegi paraqshasynda.
Onyń aitýynsha, kitaphana qory negizinen oqýlyqtardan turady, al kórkem ádebiet sany az. Olardyń basym bóligi keńestik kezeńde paidalanylǵan ideologiialyq sipattaǵy kitaptar.
«Ásirese qazaq tilinde jazylǵan qazirgi zamanǵy kórkem ádebiet – joqtyń qasy. Kórkem ádebiettiń balalarǵa qoljetimdi bolýy úshin ministrlik arnaiy joba ázirledi. Joba aiasynda bilim berý uiymdaryna qarasty kitaphanalardyń materialdyq-tehnikalyq jáne aqparattyq bazasyn jaqsartý, balalarǵa arnalǵan kórkem ádebietti jyl saiyn satyp alýdy júzege asyrý boiynsha sharalar qabyldanatyn bolady. Sondai-aq Ulttyq bilim akademiiasy ádebiet, til institýttarymen, «Oqýlyq» ortalyǵymen, Ulttyq ǵylymi kitaphanamen, NZM, BIL birlesip usynylǵan ádebietter tizimin qurýǵa kiristi. Joba aiasynda qazaq ádebietiniń de, qazaq tilindegi álem ádebietiniń de qoljetimdi bolýyna erekshe nazar aýdaramyz. Odan ózge kitaphanalardy ǵylymi fantastika janryndaǵy kitaptarmen qamtamasyz etý de mańyzdy», - dedi Ashat Aimaǵambetov.
