Búgin QR Aýyl sharýashylyǵy vitse-ministri Erlan Nysanbaev Úkimettiń jekdýadaqty aýlaýǵa ruqsat berý jónindegi qaýlysyn túsindirdi, - dep habarlaidy "Ult aqparat" tilshisi vedomstvonyń baspasóz qyzmetine silteme jasap.
"Biyl QR Úkimeti qaýlysymen 174 daraq jekdýadaqty ǵana alýǵa ruqsat berilgen. Sonymen qatar, ruqsat BAÁ men Katardyń belgili bir tulǵalaryna ǵana beriledi jáne bir qus oljalaý úshin 265 AEK kóleminde tólem bekitilgen (1 AEK - 2121 teńge). Taǵy bir aita keterlik jait, Parsy shyǵanaǵynyń elderi uzaq merzimdi yntymaqtastyq jáne jekdýadaqty dástúrli ulttyq qyran qustar salyp aýlaý týraly kelisimderge qol qoiý jolymen jekdýadaqty qorǵaý jáne ósimin molaitý boiynsha is-sharalardy qarjylandyrýǵa bastamashylyq bildirdi", - delingen habarlamada.
Sondai-aq, yntymaqtastyq týraly kelisimderdiń sheńberinde arab investitsiialarynyń esebinen Ońtústik Qazaqstan oblysynda keiinnen Qazaqstan aýmaǵynda tabiǵi mekendeý ortasyna jiberiletin jekdýadaqty jasandy jolmen ósirip-kóbeitý ortalyǵy salyndy jáne ol oidaǵydai jumys isteýde. Ortalyq jyl saiyn 5 000 daraq qus ósiredi.
Mindettemelerdi oryndaý sheńberinde arab tarapy 2009-2016 jyldar aralyǵynda Qazaqstan tabiǵatyna 7555 daraq jekdýadaq jiberdi. Sonymen birge, Ortalyq qyzmetiniń nátijesinde 200-ge jýyq jergilikti turǵyn jumysqa ornalastyryldy.
Tiisinshe, arab tarapy atalǵan qustardy ósirýde jáne tabiǵatqa keń kólemde jiberýde. Al QR Úkimeti olardyń azǵandai ǵana bóligin aýlaýǵa ruqsat beredi.
"QR AShM Orman sharýashylyǵy jáne janýarlar dúniesi komiteti jyl saiyn jan-janýarlar dúniesiniń esebin júrgizedi. Óz kezeginde, ýstimizdegi jylǵy esepke alýdyń qorytyndylary boiynsha Qazaqstan tabiǵatynda 9500-den astam jekdýadaq bar. Bul oraida biyl Úkimet qaýlysymen ruqsat etilgen aýlaý sharalarynyń jekdýadaq daraqtarynyń tabiǵatta ósip-kóbeiýine ziian keltirmeitinin atap ótý kerek. Mindettemeler sheńberinde arab tarapy jekdýadaq mekendeitin jerlerdi qorǵaý úshin 78 inspektordan turatyn janýarlar dúniesin qorǵaý qyzmetin qurǵan. Olar nysandyq kiimmen, jol talǵamaityn avtokólikpen, bailanys quraldarymen, GPS, foto jáne beine túsirý apparatýrasymen qamtamasyz etilgen", - deidi vedomstvo ókilderi.
Sonymen birge, arab tarapynyń qarajaty esebinen "Ohotzooprom" ÓB" RMQK úshin 2014-2016 jyldar aralyǵynda 81 birlik tehnika, onyń ishinde 62 jol talǵamaityn kólik, 9 Kamaz bazasyndaǵy Kýng, 10 yńǵaily vagon-úiler, sondai-aq, MI-2 tikushaǵy satyp alyndy.
Ministrliktiń anyqtamalyǵyna sáikes, Arab tarapynyń Qazaqstannyń jabaiy janýarlar dúniesin saqtaý jóninde alǵan mindettemelerdi oryndaýdan basqa, el aimaqtarynda mynadai tegin áleýmettik kómek kórsetken: OQO Otyrar aýdanynyń Sháýildir eldi mekeninde emhana (otbasy-dárigerlik ambýlatoriia) salyndy; 2003 jyly OQO Arys aýdanynyń Arys qalasynda perzenthana úii jóndeýden ótkizildi, sondai-aq qajetti meditsinalyq jabdyqtar jetkizildi; 2008 jyly Shymkent qalasynda jekdýadaqtyń analyq basyn ósirý úshin ýaqytsha tálimbaǵy salyndy. 50 jumys orny ashyldy. 2009 jyly Shymkent qalasynda, Nursat yqshamaýdanynda 120 oryndyq perzenthana salyndy jáne jabdyqtaldy; 2010 jyly densaýlyq saqtaý bóliminiń qory úshin 50 birlik "jedel járdem" avtokóligi satyp alyndy jáne berildi; 2010 jyly OQO Otyrar aýdanynda qashyqtyǵy 80 shaqyrym jol salyndy; 2013 jyly OQO Tólebi aýdanynda 100 oryndyq balalar baqshasy salyndy.
