QR Syrtqy ister ministrligi shetel azamattarynyń AQSh aýmaǵyna kirýiniń jańa erejelerin túsindirdi, dep habarlaidy "Ult aqparat".
«Qazaqstannyń Syrtqy ister ministrligine diplomatiialyq arnalar arqyly kelip túsken aqparatqa sáikes, 2021 jylǵy 8 qarashadan bastap, AQSh-tyń Azyq-túlik pen dári-dármekterdiń sapasy boiynsha sanitarlyq qadaǵalaý basqarmasy nemese Dúniejúzilik densaýlyq saqtaý uiymy maquldaǵan preparattarmen COVID-19-ǵa qarsy vaktsinatsiiany rastaityn sertifikaty (pasporty) bar adamdarǵa ǵana AQSh aýmaǵyna kirýge ruqsat etiledi.
Bekitilgen tizimge Pfizer-BioNTech, Moderna, Johnson&Johnson, AstraZeneca, Covishield, BIBP/Sinopharm, Sinovac siiaqty vaktsinalar kiredi», - dedi vedomstvodan.
Osyǵan bailanysty, atalǵan sertifikattar vaktsinatsiiaǵa jaýapty memlekettik organ bekitken nusqa boiynsha resimdelýi tiis. Bul qujattardyń túpnusqalyǵyn aviakompaniia qyzmetkerleri AQSh-qa ushqanǵa deiin tirkeý kezinde tekseredi.
Sonymen qatar, bul talaptar 18 jasqa deiingi balalarǵa, vaktsinatsiiaǵa qarsy kórsetilimderi bar adamdarǵa, sondai-aq diplomatiialyq, qyzmettik jáne tranzittik sanattaǵy vizalary bar memlekettik qyzmetshilerge nemese olardyń otbasy múshelerine jáne halyqaralyq uiymdardyń qyzmetkerlerine qoldanylmaidy.
