Memlekettik qyzmet ister agenttigi tóraǵasynyń orynbasary Marat Dáýeshev ministrlerdiń milliondap syiaqy ala alatynyn rastady, dep habarlaidy Sputnik Qazaqstan tilshisi.
Búgin ortalyq kommýnikatsiialar qyzmetinde ótken brifingte jýrnalister milliondap syiaqy alatyn ministrler týraly surady.
"Bilim jáne ǵylym ministri Ashat Aimaǵambetov byltyr 15 million teńge syiaqy aldy degen aqparat shyqty. Bul zańdy turǵydan, memlekettik qyzmetshiniń etikasy turǵysynan qanshalyqty durys? Jalpy, basshynyń osynshama kólemde syiaqy alýy durys pa?", - dep surady tilshiler.
Memlekettik qyzmet ister agenttigi tóraǵasynyń orynbasary Marat Dáýeshev bul suraqqa qysqa ǵana jaýap berdi. Onyń sózine qaraǵanda ministrler ondai syiaqy ala alady.
"Memlekettik organda osyndai ekonomiia bolsa, ol da múmkin", - dedi Dáýeshev.
Aita keteri, ortalyq kommýnikatsiialar qyzmetinde baspasóz máslihatyn ótkizgen keibir ákimder men ministrler óz jalaqysyn jariialady. Máselen, Qyzylorda oblysynyń basshysy Gúlshara Ábdihalyqova aiyna 1 million 800 myń teńge alatynyn aitqan. Al tótenshe jaǵdailar ministri Iýrii Ilinniń jalaqysy shamamen 1 million teńge bolady.
