Mádeniet jáne sport ministri Aqtoty Raiymqulova Joshy han kesenesiniń mańaiyna mazar salý áreketteriniń zańǵa qaishy ekenin aitty, dep habarlaidy QazAqparat.
Josh han kesenesiniń mańaiyna Jezqazǵandaǵy ýniversitettiń rektorynyń áýleti mazar ornatqany qanshalyqty zańdy? Tarihi-mádeni qoryq-murajaidyń aýmaǵynan jer telimi qalai berilip ketken? Ortalyq kommýnikatsiialar qyzmetinde ótken brifingide Aqtoty Raiymqulova osyndai suraq qoiyldy. Mádeniet jáne sport ministri mundai árekettiń zańsyz ekenin eskertti.
«Joshy han kesenesi respýblikalyq mańyzy bar eskertkishterdiń tizimine kiredi. Onyń aýmaǵy qoldanystaǵy zańnama boiynsha tarihi-mádeni maqsattaǵy jer bolyp sanalady. Osy mańda 1997 jyly alǵash ret kúmbezdi mazar boi kóteripti. Ol kezde nysan Mádeniet jáne sport ministrliginiń qaraýynda bolǵan joq. Joshy han kesenesi ministrlik qaraýyna 2008 jyly ǵana endi. Sodan beri mazar aýmaǵynda zańsyzdyqtar boldyrmaýǵa baǵyttalǵan jumys istep jatyrmyz», - degen vedomstvo basshysy BAQ ókilderi ataǵan jaǵdaidy arnaiy tekserý júrzigip, anyqtaý kerektigin atap ótti.
«Joshy han mazary Ulytaý tarihi-mádeni qoryq-murajaiynyń quramyna kiredi. Osy keseneniń aýmaǵynda eshqandai kelisý protsedýralaryn júrgizbei salynǵan mazarlar narazylyq týǵyzyp jatyr. «QR Tarihi-mádeni mura nysandaryn qorǵaý jáne paidalaný týraly» Zańynyń baptary boiynsha, árine, tiisti rásimder oryndalmai jasalǵan áreketter zańdy nysanǵa jatpaidy.
Jer telimin berý jergilikti atqarýshy organnyń quzyretinde ekenin bilesizder. Eskertkishtiń aýmaǵynan jer telimi nege berilgenin anyqtaýdy qajet etip tur. Ulytaý qoryq-murajaiy ákimshiliginiń jumysyndaǵy osy olqylyqtarǵa bailanysty tiisti sharalar qabyldanady», - dedi ministr.
