QR Tótenshe jaǵdailar ministri Iýrii Ilin BAQ ókilderine.Jambyl oblysyndaǵy oq-dáriler qoimasy jarylǵan áskeri bólimdegi jaǵdai týraly aityp berdi, dep habarlaidy Azattyq Rýhy.
«Búgingi tańda eki qoimada byqsyp janyp jatqan órt oshaqtary bar. Qorǵanys ministrliginiń saperleri men órt sóndirý qyzmeti sol oshaqtarda jumys istep jatyr. Jarylmai qalǵan oq-dáriler bar», - dep atap ótken Ilin osy másele boiynsha jinalys ótkizilgenin aitty.
Ministr sondai-aq, qazirgi ýaqytta Tótenshe jaǵdailar ministrliginiń bólimsheleri byqsyp jatqan oshaqtardy óshirý úshin sý tasyp jatqanyn jetkizdi.
«Oqiǵa ornynda múlikke kelgen zalady baǵalaityn komissiia jumys istep jatyr. Jaqyn kúnderi qiraǵan múlikti qalpyna keltirý jumystary bastalady. Jarylys ornynda qaýip tolyq seiilmegenin eskersek, qaita jarylys bolýy múmkin ekenin esten shyǵarmaý kerek», - dep málimdedi Ilin.
Ol sondai-aq, temirjol boiynsha júk tasymaly toqtap turǵanyn, al jolaýshylar tasymaly búgin sheshiletinin atap ótti.
«Qirandylardy arshyp, tazartý úshin biraz ýaqyt kerek, kóp shyǵyn ketedi. Onda oq-dárimen jumys istep jatqan saperlerdiń amandyǵy mańyzdy ekenin túsingen jón. Asyǵystyq jasap, olardy qaýipke itermelei almaimyz. Jarylystyń saldaryn tolyq joiý úshin arnaiy jumys tobymen, ákimdikpen, Qorǵanys ministrligimen birlese otyryp, taǵy eki-úsh kún jumys isteý qajet bolady», - dedi Iýrii Ilin.
Esterińizge salsaq, 26 tamyzda Jambyl oblysy Baizaq aýdanynda ornalasqan áskeri bólimdegi injenerlik oq-dári saqtalǵan qoimada saǵat 19:00 shamasynda qoimalardyń biriniń janynda alapat órt shyǵyp, sońy joiqyn jarylysqa ulasqan bolatyn.
Jarylys saldarynan qaza tapqandar sany 13-ke jetti. Olardyń arasynda áskeri qyzmetshiler, órt sóndirýshiler, qutqarýshylar, áskeri prokýror bar. Óli tabylǵan taǵy úsh adamnyń aty-jóni anyqtalyp jatyr.
Qorǵanys jáne Tótenshe jaǵdailar ministrlikteri áli birneshe adammen bailanys ornata almai otyr.
QR Prezidenti Qasym-Jomart Toqaevtyń Jarlyǵymen 29 tamyz – Jalpyulttyq aza tutý kúni bolyp belgilendi.
Sondai-aq, Memleket basshysynyń Jarlyǵymen áskeri jáne qyzmettik boryshyn atqarýda kórsetken erligi men janqiiarlyǵy áskeri qoima jarylysynda qaza tapqan azamattar memlekettik nagradamen marapattaldy jáne Jambyl TJD órt sóndirý jáne avariialyq-qutqarý jumystary qyzmeti bastyǵynyń orynbasary Meiirjan Qaqpasynuly Aimanovqa «Halyq qaharmany» ataǵy berildi.
