Ádilet ministri Qanat Mýsin jalǵa beriletin turǵyn úi baǵasynyń kúrt ósýine bailanysty qiyn jaǵdaiǵa tap bolǵan qazaqstandyqtarǵa keibir normalardy túsindirdi, - dep habarlaidy Massaget.kz tilshisi.
"Turǵyn úidi jalǵa alý - jalǵa berýshi men jalǵa alýshy arasyndaǵy azamattyq-quqyqtyq kelisim. Azamattyq kodekstiń 556-baby múliktik jaldaý shartyn, onyń ishinde jalǵa beriletin turǵyn úidi jalǵa berýshi shartty birjaqty tártipte buzýy múmkin jaǵdailardy naqty anyqtaidy. Tek tórt negiz bar. Olardyń ishinde jaldaýshy jaldaý qunymen kelispeýine qatysty sebep joq. Eger turǵyn úidi jalǵa berý týraly daýlar bolsa jáne olardy taraptar ózara rettemese, onda bul daý sot tártibimen rettelýge jatady. Óz quqyǵyńyzdy qorǵaý úshin sotqa júginý kerek", - dep keńes berdi ministr Májilis kýlýarynda jýrnalister suraǵyna jaýap berip.
Ol azamattyq zańnamaǵa sáikes múliktik jaldaý, onyń ishinde turǵyn úidi jaldaý sharty jazbasha túrde jasalýy kerek ekenin túsindirdi. Biraq, ókinishke qarai, kelisimder jazbasha mámile nysanyn saqtamai, aýyzsha jasalatyn jaǵdailar jii kezdesedi. Degenmen, ministrdiń aitýynsha, bul azamattyń óz quqyqtaryn qorǵaý úshin sotqa júginýine kedergi keltirmeidi.
"Árine, múmkindik bar, biraq ol sotqa usynatyn dálelderge bailanysty. Men naqty keńes bere almaimyn, óitkeni ár jaǵdai ártúrli oqiǵalardyń úilesimi. Múmkin, messendjerlerde qandai da bir hat almasý bar shyǵar. Óitkeni olar qandai da bir jolmen kelisken bolýy kerek qoi. Kýágerler bolýy múmkin. Iaǵni, jalǵa berýshi shart talaptaryn ózgertkendikten, sotta quqyqtary buzylǵanyn dáleldeý úshin adamdar barlyq qoljetimdi ádisti qoldanýy kerek. Jalpy, jalǵa berýshi jaldaý qunyn ózgerte alady, bul - onyń tolyq quqyǵy, óitkeni bul - onyń menshigi, biraq kelisimsharttarda, ádette, qashan jáne qai kezeńde (bektilgen qun - esk.) ekeni kórsetiledi. Ekinshi tarapqa jaldaý aqysy kóteriletini týraly aldyn ala habarlaý kerek, sondyqtan olardyń jalǵa berý ornyn aýystyrýǵa daiyndalýǵa ýaqyty bar", - dedi Qanat Mýsin.
