Eńbek jáne halyqty áleýmettik qorǵaý ministri Birjan Nurymbetov zeinetaqy jinaǵyn paidalanýǵa qatysty túsinik berdi, dep habarlaidy "Ult aqparat".
«El Prezidenti halyqqa Joldaýynda áleýmettik salada birqatar tapsyrma berdi. Onyń ishinde kópshiliktiń qyzyǵýshylyǵyn tanytyp otyrǵany zeinetaqy jinaǵynyń bir bóligin maqsatty paidalaný múmkindigine bailanysty. Sondyqtan osy baǵytta túsinikteme bergim keledi. Birinshiden, Memleket basshysy tarapynan tujyrymdamalyq sheshim qabyldandy. Zeinetaqy jinaqtarynyń bir bóligin kelesi jaǵdailarda paidalaný múmkindigi beriledi, iaǵni turǵyn úi jaǵdaiyn jaqsartýǵa, emdelýge jáne qarjy kompaniialaryna basqarý úshin aýdarýǵa», - dep toqtaldy ministr Joldaýdy júzege asyrý taqyrybyna arnalǵan brifingide.
Osy oraida B. Nurymbetov kimder qandai jaǵdaida jinaqtarynyń bir bóligin alýǵa qaýqarly ekenin aitty.
«Birinshiden, jumys istegen ári jumys istep júrgen bizdiń azamattar, iaǵni Biryńǵai zeinetaqy qorynda jarnalary bar azamattardyń jinalǵan somasy «jetkiliktiń sheginen» asyp jatsa. Maqsat onyń bárin taratyp berý emes, onyń qajetti bir bóligi qalýy tiis. Odan asqan aqshany azamattar óz erkimen joǵaryda aitylǵan maqsattarǵa paidalanýǵa múmkindigi bar. Mundai azamattardyń sany 530 myń adamǵa jetip otyr», - dedi ministr.
Onyń sózine qaraǵanda, ekinshisi - zeinet jasyna jetken kisiler. Eger de olarda jinaqtaýshy qorynda qarajattary bar bolsa, ol kisiler sol qarajattyń 50 paiyzyna deiin alady. Bundai adamdardyń sany 178 myńnan asady.
«Úshinshiden, zeinetaqy annýitetin resimdegen jáne áli de jinaqtary bar azamattar. Mundai elimizde 13,3 myń adam bar. Osylaisha, zeinetaqy jinaqtarynyń bir bóligin maqsatty paidalaný múmkindigin 721 myńnan astam qazaqstandyq paidalana alady», - dedi Nurymbetov.
