Densaýlyq saqtaý ministri Eljan Birtanov shý shyqqan Zaisandaǵy jaǵdaiǵa qatysty pikir bildirdi, dep habarlaidy "Ult aqparat".
«Poiyz arqyly aýyr júk kóligi áli toqtatylmaǵan. Ony qalai toqtatamyz? Ol kúndelikti júrip jatqan taýarlar. Onyń arasynda elimizge kelip jatqan tranzittik taýarlar da bar. Sol kólikter arqyly shekarany kesip ótken júrgizýshileri Shyǵys Qazaqstandaǵy Baqty jáne Maiqapshaǵai beketi arqyly keledi. Odan bólek temirjol arqyly ótetin pýnkter bar. Biz kúndelikti monitoring jasaimyz. Bizdiń sanitarlyq dáriger sol jerde turady. Teplovizorlar bizde bar. Rezervten alynǵan aqsha boiynsha qosymsha teplovizor alýǵa qazir tyrysyp jatyrmyz», - dedi Eljan Birtanov elordada ótken baspasóz máslihatynda.
Ministrdiń aitýyna qaraǵanda, shekaradan ótken barlyq júrgizýshige baqylaý júrgizý kerek.
«Mysaly bizdiń aqparat boiynsha Qytaida biznespen, saýdamen ainalysatyn birneshe Qazaqstan azamaty bar. Olar elge qaitýy kerek. Olarǵa biz múmkindik berýimiz kerek. Árine táýekelder bar. Qaýipsizdikke bailanysty kelgennen keiin olar baqylaýǵa alynýy tiis», - dedi ol.
Eljan Birtanov Zaisanda «Qytai azamattary kelip jatyr» degen jalǵan aqparat tarap ketkenin aityp ótti.
«Ol, árine, durys emes. Ótken táýlik boiynsha máselen Maiqapshaǵaidan eshkim ótken joq. Kúndelikti kóp bolsa Shyǵys Qazaqstan boiynsha 10-15 adam ótedi. Olardyń bári – bizdiń azamattar. Almaty oblysy boiynsha 20-30 adam ótedi. Álbette olar elge kelgennen keiin ary qarai infektsiiany taratý qaýpin boldyrmaý úshin aldyn alýymyz qajet. Soǵan bailanysty sol jerde arnaiy karantindik stantsiia ashýymyz kerek. Sondai buiryǵymyz bolǵan. Azamattar túsinbegen. Sol aýyldyń ambýlatoriiasyna jatqyzady dep... Sheshim boiynsha bizdiń arnaiy statsionar – Zaisan aýdanynyń ortalyq aýrýhanasyndaǵy arnaiy bólek infektsiialyq aýrýǵa arnalǵan korpýsqa jatqyzylatyn bolady. Bolsa árine (...)», - dedi ol.
Ministr sonymen qatar Shyǵys Qazaqstanda investitsiialyq jobalar boiynsha jumys istep jatqan Qytai azamattary baryn jasyrmady.
«Qupiia joq. Olardyń arasynda da jaqynda Qytaidan kelgen azamattar da bar. Olar bizdiń baqylaýymyzda. Tirkelgen aýrý adamdar joq. Olardyń densaýlyǵy durys bolsa, ary qarai jumys isteýge múmkindik berýimiz kerek. Sebebi olardyń kelisimsharttar boiynsha óz jaýapkershilikteri bar», - dedi ol.
