QR Aýyl sharýashylyǵy ministriniń mindetin atqarýshy Erbol Qarashókeev qurǵaqshylyqtan zardap shekken óńirlerge jem-shóp jibergen eriktilerge alǵys aitty, dep habarlaidy "Ult aqparat".
«Óńirler arasynda azyq-túlikti belgilengen baǵamen ózara jetkizý jáne zardap shekken sharýashylyqtarǵa shóp shabý úshin 130 myń gektarǵa jýyq shabyndyq jer bólý týraly sharttar men memorandýmdar jasaldy. Sondai-aq, tabiǵi rezervattyń 211 myń gektarynda azyq daiyndaýǵa ruqsat etildi. Bul jumysqa volonterlik uiymdar da qosyldy jáne olar zardap shekken óńirlerge shamamen 150 vagon azyq jetkizdi. Bul resýrstardy jergilikti jerlerde bólý qoǵamdyq keńesterdiń belsene qatysýymen júrgiziledi. Osy kómekti uiymdastyrǵany úshin elimizdiń barlyq eriktilerine jáne bul iske bei-jai qaramaityn azamattarǵa úlken alǵysymdy bildirgim keledi», - dedi E.Qarashókeev Úkimet otyrysynda.
Onyń aitýynsha, Azyq-túlik korporatsiiasy arqyly jemdik astyqpen qamtamasyz etý sharalary qabyldanýda, atap aitqanda, zardap shekken óńirlerdiń sýbektilerine naryqtyq baǵadan 17%-ǵa tómen baǵamen 1,2 myń tonna jemdik arpa satyldy. Qazirgi ýaqytta Azyq-túlik korporatsiiasy men «Báiterek» UBH» AQ-ǵa 200 myń tonna kóleminde jemdik astyqtyń qosymsha rezervin qurýǵa 20 mlrd teńgeden bólý jáne fermerlerge sýarý ári azyq daiyndaityn tehnikany lizingke berý máseleleri qarastyrylýda.
Buǵan qosa, «QazaqstanTemirJoly» AQ-y tamyz aiynyń sońyna deiin azyq tasymaldaýǵa jeńildikti tarifterdi naryqtaǵydan 77%-ǵa tómen deńgeide saqtaý týraly sheshim qabyldady.
Budan basqa, aǵymdaǵy jylǵy 23 tamyzda iri mal azyǵyn respýblikadan áketýge ýaqytsha tyiym salýdy engizý týraly sheshim kúshine enedi, 1 qyrkúiekten bastap jemdik astyqty eksporttaýǵa kvota engiziledi.
«Sonymen qatar, Jedel shtab jergilikti atqarýshy organdarǵa zardap shekken aimaqtarǵa kómek kórsetý qorlaryn qurýdy, saban daiyndaý jáne jemdik astyq pen kebek rezervin qurý jumystaryn uiymdastyrýdy tapsyrdy. Jeke qosalqy sharýashylyqtardy azyqpen qamtamasyz etý máselelerin erekshe baqylaýǵa alý, óz múmkindikterimen ózderin azyqpen qamtamasyz ete almaityndarǵa uiymdasqan sharýashylyqtardy bekitý usynyldy. Qoldanystaǵy zańnama aiasynda jem-shóp baǵasyn baqylaýdy kúsheitýge, baǵanyń negizsiz ósýine jol bermeý úshin qajetti sharalar qabyldaý qajettiligine erekshe nazar aýdaryldy. Osy sharalardyń barlyǵy jaǵdaidy edáýir turaqtandyrýǵa múmkindik berdi», - dedi Erbol Qarashókeev.
