Aimaqtyq deńgeide usaq-túiek para alý, laýazymyn asyra paidalaný, dórekelik derekteri tyiylmai tur. Bul týraly Facebook-tegi paraqshasynda QR Densaýlyq saqtaý ministri Aleksei Tsoi jazdy, dep habarlaidy "Ult aqparat".
Ministr atap ótkendei, keshe ótken sybailas jemqorlyqqa qarsy kúres máseleleri jónindegi keńeste Memleket basshysy Qasym-Jomart Toqaev quzyrly organdarǵa naqty tapsyrmalar júktedi.
«Joǵary laýazymdy sheneýnikterden bastap qatardaǵy qyzmetkerge deiin «barmaq basty, kóz qysty» áreketke áýestenbeýi tiis. Birinshiden, biz qoǵamdyq baqylaýǵa basymdyq berip jatyrmyz. Kez-kelgen bastama úkimettik emes uiymdardyń ókilderimen pysyqtalady. Budan bólek, «Adaldyq alańy» dep atalatyn jobalyq keńse arqyly paraqorlyqtyń aldyn alýǵa kúsh salyp jatyrmyz. Iaǵni, ministrliktiń ózinen bastap, meditsinalyq uiymdar jáne meditsinalyq oqý oryndaryna deiin qyraǵy qadaǵalanady.
Ekinshiden, Ishki aýdit qyzmetiniń jáne Ózindik qaýipsizdik departamentiniń jumysyn jandandyrdyq.
Úshinshiden, dári-dármekpen qamtý jáne meditsinalyq qyzmettiń sapasyn arttyrý maqsatynda halyq belsendileriniń «Qoǵamdyq baqylaý Qazaqstan COVID-19» qozǵalysyna qoldaý jalǵasady.
Sondai-aq jurtshylyqty jumyldyra otyryp, koronavirýspen kúreske baǵyttalǵan sheteldik gýmanitarlyq kómekti úliestirý protsesine baqylaý júrgizile beretin bolady. Bul rette, quramyna depýtattar, qoǵam qairatkerleri, sala sarapshylary, patsienttik uiymdar men salalyq qaýymdastyqtar ókilderi engen Jumys tobynyń qyzmeti qoimalarda dárilik preparattar men meditsinalyq buiymdardyń qoryna monitoring jasaýǵa baǵyttalatyn bolady», - dedi ministr.
Sondai-aq A.Tsoi Áleýmettik meditsinalyq saqtandyrý qorynyń jumysy baqylaýǵa alynǵanyn málim etti.
«Áleýmettik meditsinalyq saqtandyrý qorynyń qyzmeti erekshe baqylaýǵa alyndy. Biz Mindetti áleýmettik meditsinalyq saqtandyrý jáne COVID-19 suraqtary boiynsha 1406 Kontakt-ortalyǵynyń jumysyna taldaý júrgizdik. Dybystyq habarlamalardy «Táýligine 24 saǵat» jazatyn fýnktsiiasynan birqatar kemshilikter anyqtaldy. Olar halyqtyń kútý ýaqyty eskerile otyryp joiylatyn bolady.
Sonymen qatar, meditsinalyq uiymdar tarapynan artyǵymen jazylǵan kórsetilmegen meditsinalyq qyzmet kólemderin anyqtaý jalǵasýda. Tsifrlyq sheshimderdiń arqasynda jarty jyldyń ishinde osy baǵytta jalpy somasy 4,6 milliard teńgeni quraityn 461 myń aqaýlyqty anyqtadyq.
Osy rette, Tsifrlyq damý, innovatsiia jáne aeroǵarysh ónerkásibi ministrligimen birlesip azamattardyń jeke meditsinalyq málimetteriniń qaýipsizdigin arttyratyn bolamyz.
Degenmen, aimaqtyq deńgeide usaq-túiek para alý, laýazymyn asyra paidalaný, dórekelik jasaý derekteri tyiylmai tur. Osy máselege tereń úńilip, saraptama jasalýda. Aimaqtyq qurylymdardyń, vedomstvoǵa baǵynyshty uiymdardyń ashyqtyǵy men qoǵam aldyndaǵy eseptiligin arttyramyz.
2020 jyly memlekettik qyzmettiń elektrondy formatyn 90 paiyzǵa jetkizemiz. Osylaisha, jemqorlyqqa barynsha tosqaýyl qoiyp ári ákimshilik kedergilerdi joiamyz. Bólshek saýda jelilerinde dári-dármektiń qoljetimdiligine monitoring jasalmaǵan. Qoryta aitqanda, ministrlik jemqorlyqqa jol berýi múmkin táýekelerdi anyqtap, ony joiý úshin úzdiksiz jumys isteidi», - dedi A.Tsoi.
