Halyq aldynda esep bergen Indýstriia jáne infraqurylymdyq damý ministri Beibit Atamqulov halyqaralyq qarjy institýttarynyń aqshasyna jóndelip jatqan joldardyń jaǵdaiyna toqtaldy, dep habarlaidy QazAqparat.
«Búginde Qaraǵandydan Qapshaǵaiǵa (946 km) deiingi ýchaskelerde aýqymdy qurylys júrip jatyr. Elimizdiń shyǵysynda «Taldyqorǵan-Óskemen» (768 km) jáne «Qalbataý-Maiqapshaǵai» (415 km) joldary qaita jańǵyrtýdan ótýde. Alakóldiń týristik klasterin damytý úshin biz «Úsharal-Dostyq» (184 km) avtojolyn qaita jańartyp jatyrmyz», - degen vedomstvo basshysy «Merki-Býrylbaital» (262 km) tasjolyn qaita jańartý arqyly Balqash kóliniń kýrorttyq aimaǵyn sapaly infraqurylymmen qamtamasyz etý kózdelgenin eske saldy.
«Ońtústiktegi «Uzynaǵash-Otar» (96 km) avtojoly qaita jańǵyrtylyp, Shamalǵan stantsiiasynyń temirjol ótkeline jol airyǵy salynýda. Batystaǵy «Aqtóbe-Atyraý-Astrahan» (740 km) jobasyn júzege asyryp jatyrmyz. Osy maqsattarǵa halyqaralyq qarjy institýttarynyń qaryzdary tartylǵan. Olardyń qatarynda Dúniejúzilik, Eýropalyq qaita qurý jáne damý banki, Aziia Damý Banki jáne «Eksimbank» nesieleri bar», - dedi Beibit Atamqulov.
Ministrdiń aitýynsha, atalǵan jobalardan qiyndyqtar taýyndap jatqan kórinedi. Atap aitqanda, Eýropa qaita qurý jáne damý banki qarjylandyratyn «Balqash-Býrylbaital» (288 km) jáne «Uzynaǵash-Otar» (96 km) jobalarynda jumystardy sapasyz oryndaǵan merdigerlik uiymdarmen 4 kelisimshart toqtatylǵan.
«Qalǵan 2 ýchaske boiynsha bank erejeleri boiynsha merdiger uiymdy anyqtaý boiynsha konkýrstyq rásimder ótkiziledi. Jalpy, Memleket basshysy tapsyrǵandai, Qaraǵandy-Balqash-Almaty dálizi 2023 jyly tolyǵymen aiaqtalady», - dep sendirdi ministr.
Beibit Atamqulov «Eksimbanktiń» qarjylandyratyn «Merke-Býrylbaital» jáne «Qalbataý-Maiqapshaǵai» jobalary boiynsha «SinSin» jáne «QazGerStroi» kompaniialary qiyndyqqa tap bolǵanyn atady.
«Atalǵan jobalardy iske asyrýǵa teńgeniń qunsyzdanýy men qubylmalylyǵy áser etti. Bitým, tsement, metall, dizel baǵasynyń turaqty ósýi de áser etýde», - dedi Indýstriia jáne infraqurylymdyq damý ministri.
