Foto: gov.kz
Sý resýrstary jáne irrigatsiia ministri Nurjan Nurjigitov sý tarifine qatysty túsinik berdi, dep habarlaidy Kazinform agenttigi.
«1 qańtardan bastap egistikterge arnalǵan sýdyń ortasha ólshengen tarifi 1 teńgege ósedi. Biz aýyz sý tarifterin kóterý máselesin qarastyryp jatqan joqpyz», - dedi Nurjan Nurjigitov Senattyń jalpy otyrysynan keiin tilshiler suraǵyna jaýap bere otyryp.
Bul turǵyda ministr sý únemdeý baǵytynda josparlanǵan is-sharalarǵa toqtaldy.
«Jalpy, sý resýrstary týraly aitatyn bolsaq, Qazaqstanda jyl saiyn 100 tekshe shaqyrymnan astam sý jinalady. Onyń 54 paiyzy Qazaqstan aýmaǵynan, 46 paiyzyn transshekaralyq ózenderden alamyz. Bul negizinen ońtústik, shyǵys jáne batys aimaqtar. Qazir biz 25 tekshe shaqyrym sýdy paidalanamyz, onyń 65 paiyzy aýyl sharýashylyǵyna, 25 paiyzy ónerkásipke jáne 5 paiyzdan sál astamy kommýnaldyq-turmystyq salaǵa baǵyttalady. Sýdyń jetispeýi máselesine qatysty kóp aitylyp júr. Sý tapshylyǵyn boldyrmaý úshin ministrlik ár oblyspen birlese jańa sý qoimalaryn salý, jumys istep turǵan gidrotehnikalyq nysandardy qalpyna keltirý, sýarý júielerin jóndeý, aýyl sharýashylyǵyndaǵy sý únemdeý tehnologiialarynyń úlesin ulǵaitý turǵysynda keshendi jospardy ázirledi. Bul is-qimyldar 2030 jylǵa qarai 10 myń tekshe shaqyrymǵa deiin sýdy jinaqtap, únemdeýge múmkindik beredi», - dedi Nurjan Nurjigitov.
