Oqý-aǵartý ministri Ǵani Beisembaev "Qazaqstan" telearnasyndaǵy "Bas taqyryp" baǵdarlamasyna bergen suhbatynda sońǵy qońyraýdy 25 mamyrǵa qaitarýǵa qatysty pikir bildirdi, dep habarlaidy Sputnik Qazaqstan.
Ministr kez kelgen ideia bala úshin jasalatynyn, sapany kóterý baǵytynda durys sheshim qabyldanǵanyn atap ótti.
"Jalpy bul álemde bar tendentsiia. Buǵan deiin 34 oqý aptalyǵy bolsa, qazir 36 oqý aptasyna uzartyldy. Al álemde 38-42 aptaǵa deiin uzartqan elder bar", - dedi Ǵani Beisembaev.
Onyń aitýynsha, bul álemdik tájiribelerdi zerdelep, zerttei kele, balalardyń oqý protsesindegi júktemesin azaitý baǵytynda qabyldanǵan shara. Ony birden ózgertý qiyn.
"Biraq ata-analar maǵan "balalardyń demalysyn qaitaryńdar" dep qaita-qaita saýal joldap jatqannan keiin áriptesterimmen aqyldastym. Árine biyl jasalǵan dúnieni kúrt ózgertýge, toqtata salýǵa bolmaidy. Biyl ózgerissiz qalady", - dep tolyqtyrdy ol.
Beisembaev oqý protsesin orta jolda toqtatyp, shegerý qarjy jaǵynan da, sapaǵa da qatty áser etýi múmkin ekenin aitty.
"Sondyqtan biz maqsatty durystap aiqyndap alýymyz kerek. Balalardyń bilim sapasyn arttyrý baǵytynda jumys isteiik. Eger sapany jaqsartatyn bolsa, jańashyldyqty qabyldaýymyz kerek. Deiturǵanmen kópshilik surap jatqannan keiin sarapshylardy shaqyryp, qoǵammen, áriptesterimizben taǵy da aqyldasyp kóreiik degenim ras. Eger "bul óte mańyzdy, sońǵy qońyraýdy 25 mamyrǵa qaitarmasaq, sapa nasharlap ketedi" dep jatsa, kelesi jyly bul máseleni qarastyryp kórýge bolady. Ózgermeitin dúnie joq", - dep túiindedi Ǵani Beisembaev.
Eske sala keteiik, oqý-aǵartý ministrligi oqý jylynyń uzaqtyǵy 36 aptaǵa deiin uzarýyna bailanysty sońǵy qońyraýdy 31 mamyrǵa aýystyrǵan bolatyn. Alaida májilis depýtaty Amanjol Áltai 31 mamyr – saiasi qýǵyn-súrgin qurbandaryn eske alý kúni bolǵandyqtan, mektepterdegi sońǵy qońyraý kúnin basqa kúnge aýystyrýdy talap etti. Artynsha orta bilim berý komitetiniń tóraiymy Gúlmira Kárimova sońǵy qońyraý 1 maýsymǵa aýystyrylǵanyn málimdedi.
"Dástúr boiynsha oqý jylynyń birinshi kúni – 1 qyrkúiek, al biylǵy jyldan bastap 31 mamyr oqý jylynyń sońǵy kúni bolady. 31 mamyr – oqý kúni, bul kúni oqýshylardyń jas erekshelikterine sáikes sabaqtarmen qatar sabaqtan tys is-sharalar ótkiziledi", - dedi Kárimova.
1 maýsym jazǵy kanikýldardyń birinshi kúni bolyp sanalady.
