Búgin Astanada QR Bilim jáne ǵylym ministri Erlan Saǵadiev Mońǵoliiadan kelgen búrkitshi qyz Aisholpan Nurǵaiypqyzymen kezdesti, dep habarlaidy QazAqparat tilshisi.
Kezdesý barysynda «Bilim-Innovatsiia» halyqaralyq qoǵamdyq qorynyń prezidenti Darhan Óte ministrge Aisholpan týraly aityp berdi.
«Aisholpan eń jas búrkitshi retinde «Oskar» syilyǵyna usynylǵan qazaqtyń áigili búrkitshi qyzy. Ákesimen birge qusbegilikpen jastaiynan ainalysqan. Osy sońǵy maýsymda búrkiti 12 túlki, 2 qasqyr alǵan. Qyzymyz sondai myqty. Bizdiń qazaqtyń búrkitshilerine sheberlik keńesin bere alatyndai dárejedegi qusbegi. Aisholpan týraly filmdi kórip otyryp, onyń «Qazaqstandy kórý armanym» degen sózin estip qaldyq. Mine, sondyqtan, Aisholpandy Qazaqstanǵa alyp kelip otyrmyz. 3-4 kún boiy ol anasymen birge Astanany aralap júr», - dedi ol.
Darhan Óteniń aitýynsha, Aisholpandy AQSh-taǵy Oksford jáne Garvard ýniversitetteri shaqyrǵan.
«Biz Aisholpandy «Spektrum» mektebinde oqytyp, aǵylshyn tilin meńgerý deńgeii men akademiialyq bilimin kótereiik dep, ata-anasyna eki jyl osynda oqytýdy usynyp otyrmyz. Ata-anasy sheshim qabyldap, osy jerde oqytýdy oilap jatyrmyz», - dedi Darhan Óte.
Osy tusta ministr E.Saǵadiev Aisholpannan Qazaqstanǵa kelgisi kele me, joq pa dep surap kórdi. Qusbegi qyz: «Iá», - dep jaýap berdi.
Erlan Saǵadiev Mońǵoliiadan kelgen meimandardan áńgime barysynda, Baian-Ólgei aimaǵynda qansha qazaq mektebi baryn surady. Atap ótilgendei, onda 7-8 qazaq mektebi jumys isteidi. Bul rette ol Bilim jáne ǵylym ministrligi jyl saiyn Mońǵoliiaǵa oqýlyqtar jiberip turatynyn aityp ótti. Sondai-aq vedomstvo basshysy Aisholpan «Spektrum» mektebinde qalai oqitynyn, osy jaqta ómir súrýi qalai qamtamasyz etiletinin de bildi.
«Garvardqa oqý degen bir jaǵynan qiyn. Meniń ózim sonda oqyǵanmyn. Biraq, olar Aisholpanǵa birneshe oqý baǵyttaryn beredi. Sol baǵyttardyń arasynda keleshekte mamandyǵyn tańdaýyna bolady», - dedi ministr.
Erlan Saǵadiev qajetti kómek kerek bolsa, Aisholpanǵa barynsha kómektesýge ýáde berdi.
«Baspasózdiń betine shyǵyp, arnaiy telearnalarǵa jariialaý kerek bolyp tur. Ózimizdiń balalarymyzdyń Mońǵoliia týraly bilimin kóterip, sol jaqtaǵy qandastarymyz qalai turatynyn búgingi jas býynǵa kórsetkimiz keledi. Bizge bul óte mańyzdy. Jyl saiyn Mońǵoliiadaǵy qazaq balalaryna oqýlyqtardy jiberip otyrmyz. Biraq, ol jaqtaǵy qazaq balalaryn osynda shaqyryp, kórsetkimiz keledi. Bizde ondaǵy qazaq balalaryna jyl saiyn grant bólinedi. Kópshiligi Almatyǵa nemese Óskemenge keledi. Kópshiligi osynda jumys istep qalyp jatyr. Óte qýanyshtymyz. Kerek bolsa Ýniversitetpen (Aisholpan túskisi keletin - avt.) ózim sóilesemin», - dep túidi Erlan Saǵadiev.
