QR Sý resýrstary jáne irrigatsiia ministri Nurjan Nurjigitov Jetisý oblysyna jumys saparymen baryp, birqatar sý sharýashylyǵy nysanyn aralady, dep habarlaidy "Ult aqparat" vedomstvonyń baspasóz qyzmetine silteme jasap.
Aqsý aýdanynda «Aqeshki» sý qoimasyna bardy. Sý qoimasy qatty lailanǵan. Onyń sebebi jyl saiyn kóktemgi sý tasqyny kezinde Aqeshki ózeninen úlken kólemde lai keledi. Saldarynan, sýarmaly jerlerge sý tolyq kólemde jetpeidi. Máselen, 460 ga sýarmaly jerdiń 257 ga-na ǵana sý beriledi.
Másele jedel áreket etýdi talap etedi. Atap aitqanda, sý qoimasyn arnaiy tehnikanyń kómegimen, mehanikalyq tásilmen tazartý kerek. Búgingi tańda Jetisý filialynyń balansynda ondai tehnika joq. Nurjan Nurjigitov elimizdiń sý qoimalaryn jyl saiyn tazartý úshin «Qazsýshar» RMK filialdaryna arnaiy tehnika satyp alý máselesin qarastyrý qajet ekenin aitty.
Odan ári Qyzylaǵash sý qoimasyna baryp, Qyzylaǵash ózenindegi sý qoimasy bógetin, sý tartý gidrotorabyn jáne magistraldyq kanaldy rekonstrýktsiialaý jáne jóndeý-qalpyna keltirý jumystary boiynsha jobamen tanysty. «Qazsýshar» RMK jergilikti filialynyń basshylyǵy nysandy paidalanýǵa berý úshin «Qazgiprosýshar» institýty ÓK talaptaryna sáikes tehnologiialyq synaqtar júrgizý qajet ekenin málimdedi. Iaǵni, sý qoimasyn jobalyq kólemi 42 mln tekshe metrge deiin toltyrý qajet. Ministr baiandamalardy tyńdaǵannan keiin barlyq qatysýshy taraptarǵa nysandy paidalanýǵa berý protsesin jedeldetýdi tapsyrdy.
Nurjan Nurjigitov Qyzylaǵash sý qoimasyndaǵy qaýipsizdik júiesin muqiiat baqylady. Birneshe jyl buryn bolǵan qaiǵyly oqiǵa qaitalanbas úshin nysanda dabyl júiesi jumys isteidi. Sonyń arqasynda Qyzylaǵash jáne Eginsý aýyldarynyń turǵyndary qaýipti sý tasqyny kezinde eskertý alady. Avtomattandyrylǵan basqarýdyń arqasynda júie elektr qýaty óshken jaǵdaida da dizeldi generatordyń kómegimen jumys istei beredi.
Ministr Aqsý aýdanynda Qyzylaǵash sýarý alaby qurylysynyń barysymen tanysty.
«Joba óte mańyzdy, óitkeni sýarmaly sýdy utymdy paidalaný úshin ylǵal únemdeitin tehnologiialarǵa, iaǵni tamshylatyp jáne jańbyrlatyp sýarýǵa belsendi kóshý qajet. Osyǵan bailanysty Jetisý oblysynyń ákimdigine ylǵal únemdeitin tehnologiialarǵa kóshýdi 4%-dan 30%-ǵa deiin arttyrý kerek»,- dedi Nurjan Nurjigitov.
Sondai-aq, Islam Damý Banki bergen nesie esebinen iske asyrylyp jatqan Aqsý aýdanynyń sýarý jelilerin rekonstrýktsiialaý jobasynyń jai-kúiimen tanystym. Joba boiynsha arnalardyń jalpy uzyndyǵy 349 shaqyrymdy quraidy. Alaida tamyz aiynda qurylys-montaj jumystary toqtatylyp, merdiger uiymmen kelisimshart buzyldy. Munyń sebebi nysandaǵy qurylys jumystary óte baiaý qarqynmen júrip jatty. Ministr basqa merdigerdi anyqtaý úshin múmkindiginshe tezirek baiqaý ótkizýge tapsyrma berdi.
