QR Ishki ister ministri Erlan Turǵymbaev mitingterdegi «kettling» ádisi týraly suraqqa jaýap berdi, dep habarlaidy "Ult aqparat".
«Shynynda da, biz birneshe ret ruqsat etilmegen mitingiler ótken jerlerdi qursaýladyq. Biraq basqa elderdiń politsiiasyna qaraǵanda biz sý atqyshtaryn, jaryq-shý granatalaryn jáne basqa da arnaiy quraldardy qoldanbadyq. Bizdiń politseiler árdaiym qarýsyz, taiaqsyz, gazsyz turady jáne óz fizikalyq kúshimen ǵana atalǵan quqyqbuzýshylyqtardyń jolyn kesedi», - dep jaýap berdi Turǵymbaev Ortalyq kommýnikatsiialar qyzmetinde.
"Kettlingti azaptaý dep sanaisyz ba?" degen suraqqa ministr qazaqstandyq politseilerdiń demonstranttardy "azaptamaǵanyn" hám zorlyq-zombylyq bolmaǵanyn aitty.
«Biz barlyq azamattarǵa qorshaýdan shyǵýǵa múmkindik berdik, kúshteý-azaptaý bolǵan joq. Olarǵa sý men tamaq usynyldy. Onda esh zorlyq-zombylyq bolǵan joq. Mundai sharalar árdaiym jedel járdem kóligimen jáne dárigerlermen qamtamasyz etiledi», - deidi ol.
Ministrdiń aitýynsha, qazaqstandyq nusqaýlyqtarda bul uǵym «Adamdar toby qoǵamdyq tártipti buzyp jatqan oryndardy qursaýlaý» dep atalady.
Qazaqstan politsiiasy bilikke qarsy narazylyq ótkizgenderge kettling ádisin jii qoldanady.
