Densaýlyq saqtaý ministri Eljan Birtanov meningokokk infektsiiasynan kóz jumǵandardyń otbasylaryna kóńil aitty jáne olarmen jolyǵý jospary týraly aitty, - dep habarlaidy "Ult aqparat".
«Kóz jumǵandardyń otbasy men týystaryna qaiǵyryp kóńil aitamyz. Múmkindigimizge qarai olarmen kezdesýge tyrysamyz», - dedi Birtanov Úkimet otyrysynan keiin kýlýarda.
Sondai-aq, Birtanov Úkimet otyrysynda Qazaqstandaǵy meningokokk infektsiiasy boiynsha qalyptasqan jaǵdaidy baǵalaý úshin Almaty qalasy men oblysyna is saparmen baratynyn aitqan bolatyn.
«Bekitilgen josparǵa sáikes júrgizilip jatqan is-sharalardyń tiimdiligin baǵalaý maqsatynda Almaty qalasy men Almaty oblysyna saparǵa shyǵýdy josparlap otyrmyn. Is sapar qorytyndysy boiynsha qajet bolǵan jaǵdaida qabyldanatyn sharalarǵa ózgerister engiziletin bolady», - dedi ministr Úkimet otyrysynda.
Ol is-saparynda eń aldymen respýblikalyq shtab bekitken jáne josparlaǵan is-sharalardyń qalai oryndalyp jatqanyn baǵalaitynyn aitty.
«Qoǵamdyq densaýlyq komiteti ótkizetin profilaktikalyq jáne indetke qarsy is-sharalardyń qanshalyqty tiimdi júrgizilip jatqanyn anyqtaimyz. Ekinshiden, meditsinalyq kómek kórsetetin uiymdardyń, sonyń ishinde jedel kómek kórsetetin uiymdardy halyq jazǵyryp jatyr. Bul Almaty qalasy men oblysynyń densaýlyq saqtaý basqarmalaryna qatysty jaǵdai, osy sebepti sol jerge baryp jumysyn baǵalaý qajettiligi týyndap otyr», - dedi ol.
