Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin memlekettik organdardaǵy tsifrlandyrý kemshilikterin atady, dep habarlaidy QazAqparat.
«Basqa ministrliktermen birlese ekspress taldaý jasadyq. Qazirgi kezde Densaýlyq saqtaý ministrliginde 50-den asa aqparattyq júie bar. Biz olardyń tek 24-in ǵana kórdik, qalǵan 28-i biz úshin belgisiz boldy. Biz quzyretti ministrlik retinde olardyń bar ekenin bilmedik. Mundai suraq neden týyndady? Birikken IT-arhitektýra tolyqqandy jasalmaǵan, iaǵni ol jasalsa da ministrlikter oǵan sai jumys istemeidi. Vedomstvo qurylymyndaǵy uiymdardyń ishinde tiisti aqparattyq júielerdi standarttarǵa sáikes emes jasaidy, saldarynan olar bizge kórinbeidi. Sol sebepti dárigerler birneshe júiede jumys isteýde. Árine, bul jaǵdai qyzmet kórsetý ýaqytyn uzartady», - dedi ministr tsifrlandyrý taqyryby boiynsha Senatta ótken Úkimet saǵatynda.
Sondyqtan osy saladaǵy problemalardy sheshý úshin Densaýlyq saqtaý ministrligimen birlese biryńǵai arhitektýra ázirlenýde.
Osy saladaǵy basty másele – ol platformany qajetti deńgeide qosý. Barlyq aqparattyq júieni biriktirip, jobany torlyqqandy iske qosý úshin Densaýlyq saqtaý ministrimen tiis kelisim jasaldy. Bul turǵyda dárilik zattardyń, tósek oryndarynyń, densaýlyq pasporttarynyń derekqorlary qurylýda.
Onyń sózine qaraǵanda, memlekettik organdardy tsifrlandyrýda birqatar problemalar bar. Bul birinshi kezekte IT mamandarynyń álsiz kadrlary.
«Sonymen qatar, qazirgi kezde mańyzdy problemalardyń biri – ol memlekettik qyzmetterdiń úlesin avtomattandyrý úshin jarys bar. Barlyq kúsh-jiger sapaǵa emes, sanǵa baǵyttaldy», - dedi B. Mýsin.
Onyń paiymynsha, memlekettik organdardy tsifrlandyrý problemalaryn júieli sheshý úshin kadrlar men biliktilik máselesine mán berý kerek.
«Segiz memlekettik organda tsifrlandyrý baǵytynda derbes jaýapty vitse-ministrler bekitildi. Biraq ta olarmen jumys atqaratyn 500-den astam adamnyń ortasha jalaqysy 150 myń teńgeni qurap tur. Olardyń deńgeiin de kóterý kerek. Sondyqtan biz tsifrlyq quziret ortalyǵyn ashamyz. Onda júielik taldaý, protsesterdiń reinjiniringi, derekterdi basqarý jáne basqa baǵyttarda osy qyzmetkerlerdiń biliktilin arttyramyz», - dedi ministr.
