Mektep ashanalaryndaǵy as mázirin qaita qaraý kerek. Bul týraly QR Oqý-aǵartý ministri Ashat Aimaǵambetov aitty, dep habarlaidy QazAqparat.
Ministrliktiń apparat jinalysynda Ashat Aimaǵambetov mektepterde balalardy ystyq tamaqpen qamtamasyz etý máselesine toqtaldy.
«Qazir ystyq tamaqpen qamtamasyz etý kórsetkishi ósip otyr deimiz. Biraq odan bólek qazirdiń ózinde ystyq tamaqpen qamtamasyz etip otyrǵan ashanalardyń jumysyn jetildirýde júieli jumys bolýy kerek. Ol boiynsha komitet tisti zańnamalyq ózgerister daiyndady. As mázirin Densaýlyq saqtaý ministrligimen birge jańadan qaraýymyz kerek», - dedi ol.
Ministr mektep býfetterinde baǵaǵa qatysty da probemanyń bar ekendigin basa aitty.
«Ár bilim bólimi, ár bilim basqarmasy buǵan kóńil bólýi kerek. Elorda mektepteriniń ózinde baǵanyń ósýi bar. 0,5 litr sýdyń baǵasy 350 teńge degen masqara. Basqa oblystar da mektep ashanalaryndaǵy baǵany qarańyzdar. Osy máseleni júieli sheshý úshin tiisti zańnamalyq ózgerister engizemiz. Jańa oqý jylyna deiin bul problema sheshilýi kerek», - dedi Ashat Aimaǵambetov.
Sonymen qatar ol balalardy qaýipsiz tapsymaldaý úshin biyl 515 avtobýs satyp alynatyndyǵyn atap ótti.
«Ol jumysty tamyz aiyna deiin bitirýimiz qajet. Keibir óńirler bul jumysty áli bastaǵan da joq. Biz respýblikalyq deńgeide bul máseleni sizderge sheshtik, tiisti quraldardy berdik. Másele jalpy sheshilip otyr. Endi sony aiaǵyna deiin jetkizip, jumysty jańa oqý jylynyń basyna deiin bitirý qajet», - dedi ministr.
